“Jonni — hammaning sevimli qahramoni, odamlar ham uni bilamiz, deb o‘ylaydi”. Ember Xyord ilk bor sud haqida so‘zlab berdi

Suddan keyin Jonni Deppning muxlislari xursand bo‘lsa-da, Ember Xyordni qo‘llab-quvvatlayotgan jamoa hayratda, deb yozadi The Symbol.

Xyord oy boshidan beri birinchi marta sukunatni buzib, NBC telekanaliga intervyu berdi. Aktrisa allaqachon hukmga e’tirozi borligini ma’lum qilgan. U sud qaroridan hafsalasi pir bo‘lganini va “bu hukm boshqa ayollar uchun nimani anglatishini” ham aytib o‘tgan.

Today shousi boshlovchisi bilan emotsional suhbatda Xyord sudyani ayblamasligini, chunki “uning boshqa iloji yo‘qligini” ma’lum qilgan. Aktrisa achchiq kinoya bilan: “Qanday qilib ular boshqacha qaror qilsin? U (Depp) hammaning sevimli qahramoni, odamlar ham uni bilamiz, deb o‘ylaydi”, — dedi.

Aktrisaning so‘zlariga ko‘ra, u jarayon boshlanishi bilan paydo bo‘lgan ishonchsizlik va nafratni hanuzgacha his qilmoqda: “Agar men bularning barchasiga loyiq ekanligimga va yolg‘on gapirayotganimga ishonchingiz komil bo‘lsa ham, sud adolatli o‘tdi va ommaviy axborot vositalari uni xolis yoritdi, deb tasdiqlay olmaysiz”, — deydi Ember Xyord.

Eslatib o‘tamiz, sud Ember Xyordni Jonni Deppga tuhmat qilganlikda aybdor deb topdi. Aktrisa buning uchun sobiq turmush o‘rtog‘iga 15 million dollar to‘lashi kerak.