Таниқли Голливуд актёри 65 ёшли Том Хенкс ўз мухлисларини янги роллар билан хурсанд қилишда давом этмоқда. Яқинда актёр режиссёр Баз Лурманнинг Элвис Пресли ҳаёти ҳақида ҳикоя қилувчи фильмида иштирок этди. Автобиографик картинада актёр қўшиқчининг менежери ролини ўйнади, деб ёзади People Talk.
Том Хенкс Австралияда бўлиб ўтган ушбу фильмнинг премьерасида иштирок этди. Тадбирда у жамоатчилик билан мулоқот қилган. Маълум бўлишича, тақдимот давомида актёрнинг ўнг қўли қаттиқ қалтирагани, ҳатто микрофонни тушириб юборишига оз қолгани сезилган.
Шундан сўнг актёрнинг мухлислари жиддий хавотирга тушди. «Ўзингизни эҳтиёт қилинг, Том», «Ўтган ҳафта Оне Show’да у жуда ориқ кўринди», «Умид қиламанки, гастрол жуда чарчатган», «Ўтган ҳафта у шоуларнинг бирида қалтираб кетди, ўзи ҳам унчалик яхши кўринмади», — деб ёзган мухлислар.
Бироқ актёрнинг бу ҳолатини ёш билан боғлаганлар ҳам бўлди. «У 65 ёшда, келинг, уни тинч қўяйлик», «У қариб қолган», «Ангела Меркель бир неча йил олдин шундай бўлган эди. Бу стресс ва иссиқлик билан боғлиқ эди. Жиддий нарса бўлиши мумкин эмас», — деб изоҳ берган интернет фойдаланувчилари.
Изоҳ (0)