Испанияда иссиқ иқлим туфайли ўрмон ёнғинлари сони кескин ортиб кетди. Бу ҳақда бир қатор Европа ОАВга таяниб «Интерфакс» хабар берган.
Ўт ўчирувчилар ўрмонларда келиб чиққан ёнғинлар билан Каталония ҳудудида ҳам кураш олиб бормоқда. Балдомар шаҳри яқинида юз берган ёнғинлар оқибатида қарийб минг гектар ўрмон ҳудуди култепага айланган.
Ёнғин хавфсизлиги ходимлари ўрмон ёнғинлари бартараф қилинмайдиган бўлса у ҳолда 20 минг гектар майдондаги дарахтзорлар йўқ бўлиб кетиши мумкинлиги ҳақида огоҳлантирган.
Юзлаб ўт ўчирувчилар ўрмонлар ҳудудида техника, жумладан самолётлар ёрдамида оловни ўчиришга ҳаракат қилган.
2022 йил 5 июнь ҳолатига 2021 йилнинг мос даври билан таққослаганда Испанияда ўрмон ёнғинлари кузатилган майдон 34 фоизга камроқ эди ва бу 2018 йилдан бери кузатилган энг паст кўрсаткич ҳисобланарди. Аммо иссиқ ҳарорат, шамол ва момақалдироқ оқибатида бутун мамлакат ҳудудида ўрмон ёнғинлари авж олди.
16 июнда мамлакатнинг бир қатор ҳудудларида ҳаво ҳарорати Цельсий шкаласи бўйича 40 градусдан ошиб кетган. Испанияда кузатилаётган жазирама иқлим 1981 йилда кузатилган иссиқ ҳароратнинг такрори бўлди.
Жазирама иқлим Европанинг бошқа давлатлари, хусусан Францияни ҳам четлаб ўтмаган.
Изоҳ (0)