Бишкекда Қирғизистоннинг собиқ президенти Алмазбек Атамбаевга қарши қўйилган иккита жиноий иш бўйича суд жараёни якунланди, деб ёзади «24.kg» нашри.
Первомайский туман суди Атамбаев Туркия фуқароларига ноқонуний равишда паспорт берганликда ва «Калис-Ордо» турар-жой массивидаги мактаб қурилишида мансаб мавқейини суиистеъмол қилганликда айбланган ишни кўриб чиқди.
Судья Мирлан Термечиков Алмазбек Атамбаевни ҳар икки ишда жиноят таркиби йўқлиги сабабли оқлади.
Эслатиб ўтамиз, 2020 йилнинг июнь ойида Алмазбек Атамбаев «қонундаги ўғри» Азиз Батукаевнинг ноқонуний озод этилиш иши бўйича коррупцияда айбдор деб топилиб, ўн бир йил-у икки ойга қамалган эди.
2021 йил ёзида эса у Туркия фуқароларига ноқонуний паспорт бериш, шунингдек, 2020 йил октябрь ойида оммавий тартибсизликлар уюштиришда айбланди.
Жорий йилнинг июнь ойи бошида Қирғизистоннинг собиқ президенти 2010 йил июнида мамлакат жанубида юз берган оммавий тартибсизликлар бўйича ўз мансаб ваколатини суиистеъмол қилганликда айбланган эди. Атамбаев 2010 йил июнь ойида маҳаллий қирғизлар ва ўзбеклар ўртасидаги этник тўқнашувларнинг олдини олиши мумкин бўлгани, лекин у буни амалга оширмаганликда айбланади.
Изоҳ (0)