Ташқи ишлар вазири вазифасини бажарувчи Владимир Норов 16 июнь куни Уммоннинг Ўзбекистондаги фавқулодда ва мухтор элчиси Аҳмад ал-Қасирийни қабул қилди. Бу ҳақда ТИВ хабар қилди.
Қайд этилишича, турли соҳалардаги икки томонлама муносабатларнинг бугунги ҳолати ва уни ривожлантириш истиқболлари муҳокама қилинган. Ўзбекистон ва Уммон сиёсий мулоқотни, жумладан, сиёсий маслаҳатлашувлар, парламентлараро алоқаларни ривожлантириш, делегацияларнинг ташрифларини ўзаро асосда ташкил этиш орқали йўлга қўйишга тайёрлиги билдирилган.
БМТ, Ислом ҳамкорлик ташкилоти ва бошқа халқаро институтлар доирасидаги ўзаро ҳамкорликка алоҳида эътибор қаратилган.
Савдо-иқтисодий муносабатларни фаоллаштириш, жумладан, товар айирбошлаш ҳажмини ошириш, Уммон инвестициясини жалб этиш, қўшма лойиҳаларни амалга ошириш бўйича самарали чора-тадбирлар кўриш зарурлигига эътибор қаратилган.
Томонлар маданий-гуманитар, илмий-тадқиқот ва таълим соҳасидаги алмашинувларни йўлга қўйишдан манфаатдор эканини билдирган.
Учрашувда томонларни қизиқтирган бошқа масалалар ҳам кўриб чиқилган.
Бундан ташқари, Владимир Норов шу куни Покистоннинг мамлакатдаги фавқулодда ва мухтор элчиси Саййид Али Асад Ғилонийни қабул қилган. Учрашувда Марказий ва Жанубий Осиё ўртасидаги ўзаро боғлиқликни мустаҳкамлашда муҳим аҳамият касб этаётган Ўзбекистон—Покистон стратегик шериклик муносабатлари ривожланишининг ижобий суръати қайд этилган. Олий даражадаги мулоқотлар чоғида эришилган келишувларни амалга оширишнинг бориши кўриб чиқилган.
Бўлажак учрашувлар жадвали Покистон ташқи ишлар вазирининг Ўзбекистонга ташрифи юзасидан фикр алмашилган. 28—29 июль кунлари Тошкент шаҳрида бўлиб ўтадиган Шанхай ҳамкорлик ташкилотига аъзо давлатлар ташқи ишлар вазирлари кенгаши мажлисида иштирок этиш учун Покистон ташқи ишлар вазирининг Ўзбекистонга ташрифи муҳокама қилинган.
Ўзбекистон ва Покистоннинг халқаро майдонда, хусусан, БМТ, ШҲТ, Ислом ҳамкорлик ташкилоти ва Иқтисодий ҳамкорлик ташкилоти доирасидаги саъй-ҳаракатларини мувофиқлаштиришни давом эттириш бўйича келишувга эришилган.
Савдо-иқтисодий ҳамкорликни, хусусан, икки мамлакат ўртасида имзоланган транзит ва имтиёзли савдо тўғрисидаги битим доирасидаги келишувларни кенгайтириш истиқболларига алоҳида эътибор қаратилган. Томонлар ўзаро товар айирбошлаш ҳажмини 1 миллиард АҚШ долларигача ошириш юзасидан саъй-ҳаракатлари якдил экани тасдиқланган.
Шунингдек, Ўзбекистон ва Покистон томонлари маданий-гуманитар алмашинувлар соҳасидаги алоқаларни кенгайтиришга тайёр экани қайд этилган.
Изоҳ (0)