«Текширтирсак, Украинага бормаган, ҳатто у ерда ўқимаган одамлар келиб чиқди» – олий таълим вазири ўқишини Ўзбекистонга «перевод» қилмоқчи бўлган сохта талабалар ҳақида гапирди

Президент Шавкат Мирзиёев томонидан Украинадан қайтган ўзбекистонлик талабалар ўқишини маҳаллий университетларга кўчириш бўйича топшириқ берилган эди. Аммо аксарият ёшлар «перевод» масаласида қалбаки ҳужжатлар топширгани аниқланган. Бу ҳақда 16 июнь куни олий таълим вазири Абдуқодир Тошқулов журналистларга берган интервьюсида маълум қилди, дея хабар бермоқда «Дарё» мухбири.

Абдуқодир Тошқуловнинг айтишича, текширилган минглаб ҳужжатлар қалбаки бўлиб чиққан.

«Президентимиз Украинадаги воқеалар асносида у ерда ўқиётган 400 нафарга яқин талабаларни Ўзбекистонга олиб келиб, маҳаллий олий таълим муассасаларига ўқишга жойлашимиз бўйича топшириқ бергандилар. Ташқи ишлар вазирлигимиз қандай қийинчиликлар билан уларни олиб келди. Лекин минг афсус, ундан кейин қанақадир фирмалар пайдо бўлди. 400 нафарга яқин дейилган рақам 3 минг нафардан кўп бўлиб кетди. Текширтирсак, Украинага бормаган, ҳатто у ерда ўқимаган одамлар келиб чиқди. 600-700 нафарини ҳужжатини текшириб, ҳуқуқ-тартибот органларига бериб, саралаб ўтказдик. Лекин бирортаси судга бермади, ҳақини ҳам бирортаси талаб қилгани йўқ. Чунки улар қалбаки ҳужжатлар топширган», – деди вазир.

Аввалроқ Украинадан қайтиб, ўқишини Ўзбекистонда давом эттириш истаги бўлган талабаларнинг ҳужжатлари ҳудудий ишчи гуруҳлар томонидан қабул қилинаётгани билдирилганди.