Олий Мажлиси Сенати раиси, Одам савдосига ва мажбурий меҳнатга қарши курашиш миллий комиссияси раиси Танзила Норбоева бошчилигидаги Ўзбекистон делегацияси АҚШга ташрифнинг илк кунида АҚШ расмийлари, жамоатчилик ва ишбилармон доиралари вакиллари билан бир қатор учрашув ҳамда музокаралар ўтказди. Бу ҳақда юқори палата ахборот хизмати хабар қилди.
Хусусан, АҚШ Давлат котибининг Фуқаролар хавфсизлиги, демократия ва инсон ҳуқуқлари масалалари бўйича ўринбосари Узра Зея билан учрашув ўтказилган. Унда томонлар мамлакатда мажбурий меҳнатга барҳам бериш, одам савдосининг олдини олиш ва унга чек қўйиш, қишлоқ хўжалиги соҳасини ислоҳ қилиш, бу борада халқаро тузилмалар ва фуқаролик жамияти институтлари билан ўзаро ҳамкорлик қилиш бўйича кўрилаётган ҳуқуқий ҳамда институционал чора-тадбирларини муҳокама қилган.
Давлат котиби ўринбосари мажбурий меҳнатга барҳам бериш борасидаги саъй-ҳаракатларни юқори баҳолаган. Ўзбекистон нисбатан қисқа вақт ичида ютуқларга эришганини, Қўшма Штатлар мамлакатдаги ўзгаришларнинг ижобий динамикасини қўллаб-қувватлашни давом эттиришга тайёрлигини таъкидлаган.
Унинг фикрича, эришилган ютуқлар тўқимачилик соҳасида жаҳон бозорида Ўзбекистоннинг рақобатбардошлигини мустаҳкамлайди.
У.Зея Давлат департаментининг одам савдоси тўғрисидаги маърузасида Ўзбекистоннинг ўрни «назорат остидаги рўйхат»дан иккинчи даражага (Tier-2) кўтарилганини қутлаган. Ушбу ҳаракатлар давом эттирилишига умид билдирган.
Учрашув якунида томонлар Ўзбекистонда меҳнат муносабатларини янада яхшилаш учун янги лойиҳаларни амалга оширишга келишиб олган.
Шунингдек, 15 июнь куни Сенат раиси АҚШ Конгресси Ташқи ишлар қўмитасидаги Осиё, Тинч океани ва Марказий Осиё минтақаси бўйича қуйи қўмита раиси, Калифорния штатидан сайланган конгрессмен-демократ Ами Бера билан учрашган. Учрашувда парламентлараро ҳамкорликни чуқурлаштириш истиқболлари муҳокама қилинган.
Ами Бера Ўзбекистонда ва Марказий Осиё минтақасида хавфсизликни таъминлашда кўп қиррали ҳамкорликни давом эттиришдан манфаатдорлигини айтиб ўтган. Учрашув якунида Ўзбекистон—Америка кун тартибининг долзарб масалалари юзасидан парламентлараро алоқаларни фаоллаштириш бўйича келишувга эришилган.
Бундан ташқари, Танзила Норбоева ташриф доирасида АҚШнинг Европада хавфсизлик ва ҳамкорлик бўйича комиссиясининг (Хелсинки комиссияси) катта сиёсий маслаҳатчиси Женис Хелвиг билан сухбатлашган. Учрашувда Ўзбекистоннинг сўнгги йилларда мажбурий меҳнат ва болалар меҳнатига барҳам бериш соҳасидаги ишларига эътибор қаратилган.
Хелсинки комиссияси вакили бу борада Cotton Campaign халқаро коалицияси томонидан ўзбек пахтасига қўйилган бойкот бекор қилингани муҳим воқеа эканини айтиб ўтган.
Изоҳ (0)