Тожикистон иқтисодий ривожланиш ва савдо вазири ўринбосари Абдураҳмон Абдураҳмонзода ва Ўзбекистон инвестициялар ва ташқи савдо вазири ўринбосари Бадриддин Обидов Ўзбекистоннинг Жаҳон савдо ташкилотига аъзо бўлиш жараёнини муҳокама қилди.
Учрашув 15 июнь куни Женевада ўз ишини якунлаган ЖСТ вазирларининг уч кунлик конференцияси доирасида бўлиб ўтди.
Ўзбекистонга миллий иқтисодиёт манфаатларини ҳисобга олган ҳолда ЖСТга аъзо бўлиш жараёнида Тожикистон тажрибасидан фойдаланиш таклиф қилинди, дея хабар қилди Тожикистон Иқтисодий ривожланиш ва савдо вазирлиги матбуот хизмати.
Шунингдек, хабарда «Ўзбекистон ва Тожикистон икки томонлама ўзаро манфаатли савдо-иқтисодий ҳамкорликни янада мустаҳкамлашга тайёр эканликларини тасдиқладилар», дея қўшимча қилинади.
Ўзбекистоннинг ЖСТга тўла ҳуқуқли аъзо бўлиш учун биринчи сўрови 1994 йилда берилган. Бироқ маълум шартларни бажаришдан иборат бўлган аъзолик жараёни бир неча йилларга чўзилган, бу биринчи навбатда, мамлакатнинг биринчи президенти Ислом Каримов даврида Ўзбекистоннинг ёпиқ бўлгани билан изоҳланади.
2017 йил, Шавкат Мирзиёев ҳокимиятга келганидан сўнг аъзоликка кириш жараёни қайта тикланди.
Ўзбекистон бош вазири ўринбосари Сардор Умурзоқов жорий йилнинг 14 июнь куни ЖСТ конференциясида сўзлаган нутқида пандемиянинг салбий оқибатлари туфайли ташкилотга аъзо бўлиш жараёни мураккаблашганини таъкидлади. У ЖСТга аъзо мамлакатларни янада мослашувчан бўлишга чақирди ва Ўзбекистон аъзолик жараёнини имкон қадар тезроқ якунлаш ниятида эканлигини маълум қилди.
Тожикистон ўн бир йиллик музокаралардан сўнг 2013 йилнинг март ойида ЖСТнинг 159-тўлиқ аъзосига айланган эди.
Мавзуга доир:
- Сардор Умурзоқов ЖСТ раҳбарияти билан Ўзбекистоннинг ташкилотга аъзо бўлиш масаласини муҳокама қилди
- Ўзбекистон Жаҳон савдо ташкилотига тез фурсатда кириши кутилмоқда
- «ЖСТ аъзоси бўлмаслигимиз миллий ва иқтисодий манфаатларимизни ҳимоя қилиш воситаларидан фойдаланмаётганимизни билдиради» — Содиқ Сафоев ЖСТ ва ЁИИ ҳақида
Изоҳ (0)