Ижтимоий тармоқларда тўй куни ўйинда ютқазиб қўйган куёв келинни ургани акс этган видеолавҳа тарқалди. Оила ва хотин-қизлар давлат қўмитаси Сурхондарё вилоят бошқармаси ахборот хизмати «Дарё»га ҳолат бўйича маълумот берди.
Қайд этилишича, ҳолат 2022 йилнинг 6 июнь куни Сурхондарё вилояти Узун тумани «Толтўғай» маҳалласида содир бўлган. Х.Р. (1997 йилда туғилган) ва (2003 йилда туғилган) Д.А. ўртасида никоҳ тўйи бўлган. Тўй маросими давомида келин ва куёвга ўралган ҳолдаги ширинлик берилиб, уни ким биринчи бўлиб очиш («Сюрприз») ўйини ўтказилган. Унда келин биринчи бўлиб ширинликни очган. Бундан куёвнинг жаҳли чиқиб, келинга бир маротаба тарсаки урган. Шундан сўнг тўй давом этиб, ҳеч қандай кўнгилсиз ҳолат содир бўлмаган ва ҳеч қаерга мурожаат тушмаган.
Воқеани мазкур маҳаллада яшовчи маҳалладошлари томонидан видеотасвирга туширилган ва тасвирга олган (аниқлашнинг имкони бўлмаган) шахс томонидан интернетга жойлаштирилган.
Ҳолат юзасидан Узун тумани ИИБ томонидан суруштирув ишлари олиб борилган. Куёв ва келин ҳамда уларнинг ота-оналари билан профилактик суҳбат ўтказилиб, муҳокама қилинган. Фуқаро Х.Р.нинг хатти-ҳаракатларида ҳуқуқбузарлик ҳолати мавжудлиги сабабли ҳужжатлаштирилиб, тўпланган ҳужжатлар Жиноят ишлари бўйича Узун туман судига юборилган.
Бош прокурор матбуот котиби Ҳаёт Шамсутдиновнинг маълум қилишича, фуқаро Х.Р.га нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий иш қўзғатилган.
Изоҳ (0)