Қозоғистоннинг Атирау шаҳридаги Аҳолига хизмат кўрсатиш марказига мингга яқин Ўзбекистон фуқаролари ёғилиб келаётгани тўғрисида хабар берилганди. «Дунё» агентлигининг ёзишича, вазият Ўзбекистоннинг мамлакатдаги Бош консулхонаси томонидан назоратга олинган.
Ўзбекистон фуқаролари Россия билан чегара ёпиқ бўлгани сабабли Қозоғистонда вақтинчалик ишлаш учун рухсатнома олмоқчи бўляпти. Улар ўз паспортларини янгилагани туфайли вақтинчалик ишлаш учун қайтадан рухсатнома олиши зарур. Шу сабабли марказда эрта тонгдан кечгача навбатлар кузатилмоқда.
«Авваллари Қозоғистонда ишлаш учун рухсатнома Миграция полицияси бошқармаси ходимлари томонидан берилган бўлса, энди Меҳнат вазирлиги томонидан берилмоқда. Шу сабабли барча чет элликлар Аҳолига хизмат кўрсатиш марказларига бориб, ҳужжатларини топширмоқда. Ўзбекистонда чет элга чиқиш паспорти жорий қилинди, оддий паспорт билан энди чет элда ишлашга рухсат берилмайди. Агар бизнинг базамизда уларнинг яшил паспорти турган бўлса, бирдан рад жавоби олишади», — деганди «Ҳукумат фуқаролар учун» давлат корпорацияси Атирау филиали бошлиғи ўринбосари Жалгас Жарасов.
Маълум қилинишича, 13 июнь куни бош консул Отабек Турсинбеков Атирау шаҳридаги Фуқароларга хизмат кўрсатиш марказидаги вазият бўйича марказ раҳбари Муса Хайруллиев билан телефон орқали мулоқот қилган. Аниқланишича, ҳозирги пайтда марказда фуқароларни қабул қилиш бўйича ходимлар сони 10 нафардан 26 нафарга кўпайтирилган, фуқароларни қабул қилиш вақти эса соат 00:00 га қадар узайтирилган.
Шу вақтга қадар 1,1 минг нафар фуқаронинг ҳужжатлари қабул қилиниб, шундан 800 нафарининг ҳужжатлари кўриб чиқилиб, ижобий ҳал қилинган. Мазкур масала бўйича Қозоғистон Рақамли ривожлантириш, инновациялар ва аэрокосмик саноати вазирлигидан ҳам вакиллар келишиб, марказдаги вазият ўрганилган ва назоратга олинган.
«Маҳаллий ҳокимият ҳам ушбу масалани ижобий ҳал қилиш бўйича барча чораларни кўрмоқда», — дейилади хабарда.
Атирау шаҳридаги Ўзбекистон фуқароларини расмий рўйхатга олиш жараёни билан боғлиқ вазият Атирау вилояти ҳокимияти ва ваколатли идоралари ҳамда мамлакатдаги Бош консулхона томонидан доимий назоратга олинган.
Изоҳ (0)