Ижтимоий тармоқларда Намангандаги «Ертикон» сув омбори ташқи тўғони остидан сув сизиб чиқаётгани ҳақида хабарлар тарқалди. Вилоят ФВБ ҳолат юзасидан бирламчи маълумот берди.

Қайд этилишича, 14 июнь куни соат 10:35 да Наманган вилояти Фавқулодда вазиятлар бошқармаси тезкор навбатчисидан олинган оғзаки маълумотга кўра, Косонсой тумани, Қуқунбой қишлоғида жойлашган «Ертикон» сув омборидан сув сизиб чиқиши (фильтрация) кузатилган.

Юқоридаги ҳолатни бартараф этиш мақсадида сув омборида Наманган вилояти ФВБ ҳамда тегишли ташкилот масъул ходимлари билан биргаликда ўрганиб чиқилди. «Ертикон» сув омборининг 2 та ерли жойларидан (5 ва 10 литр секундига) сув сизиб чиқиши 13 июнь куни 19:00 лардан бошлангани, дамба (темир бетон)нинг ўзи мустаҳкамлиги, аҳолига ва тўғонга хавф йўқлиги аниқланган.

Сув сизиб чиқишини бартараф этиш мақсадида «Косонсой» сув омборидан сувни чиқариш тўхтатилган, «Ертикон» сув омборидан сувни чиқариш Калбува ва Муса ариқ каналлари (авариявий ташлама) орқали 4 метр секундгача оширилган (сув омборидан сувни шу ҳажмда чиқарилиши натижасида 2 сутка мобайнида давом эттирилиши эвазига сизиб чиқаётган сув — фильтрация жойлари бартараф этилди).

Қайд этилишича, ҳозирда ушбу сув омборида вазиятни кузатиб бориш ва ишларни назорат қилиш мақсадида тегишли мутахассисларидан иборат тун-у кун кузатув пости ташкил этилди.