Мексиканинг нисбатан осойишта ҳисобланган Пуэбла ва Тлакскала штатларини боғловчи йўл ёқасидан 19 август куни 6 нафар эркакнинг узилган боши топилди. Бу ҳақда BBC хабар берди.
Маҳаллий ҳуқуқ-тартибот органларига кўра, ушбу штатлар аввал картелларга оид жиноятлар ва зўравонликлар билан танилмаган. Полиция ҳозирча қотилликлар сабаби ёки жиноят ортида қандай жиноий гуруҳ тургани борасида изоҳ бермаяпти. Бироқ маҳаллий ОАВнинг хабар беришича, ҳодиса жойида адёл қолдириб кетилган бўлиб, унда огоҳлантирувчи ёзув қайд этилган. Мазкур хабарда рақиб жиноий гуруҳларга таҳдид йўлланган бўлиб, у “Ла Барредора” (яъни “Супурувчи”) номидан имзоланган.
Прокуратура бошқармаси топилган бошлар эркакларга тегишли эканини тасдиқлаган ва ҳодиса юзасидан тергов бошлаганини маълум қилган. Ҳудудда наркотик савдоси билан бир қаторда, ёқилғи контрабандасига — “ҳуачиcолеа” номи билан машҳур ноқонуний фаолиятга ҳам дуч келинади. Бу соҳадаги ноқонуний даромадлар миллиардлаб долларни ташкил қилади. Мексика ҳукумати ҳозирча ушбу воқеа юзасидан расмий баёнот бермаган. Ҳодиса мамлакат президенти Клаудиа Шейнбаум раҳбарлигидаги ҳукуматнинг фентанил савдосига қарши кескин кураш олиб бораётган пайтига тўғри келмоқда.
Олдинроқ, июнь ойида, Мексиканинг Синалоа штатида 20 кишининг жасади топилгани, улардан тўрттаси бошсиз экани хабар қилинганди. Май ойида эса Гуанажуато штатида католик байрамида юз берган отишма оқибатида 7 нафар ёш йигит ҳалок бўлган.
Сўнгги йилларда Мексикада картеллар ўртасидаги тўқнашувлар кескин кучайган. Ҳукумат 2006 йилдан буён ҳарбийларни жиноятчиликка қарши сафарбар қилган, аммо шу пайтгача юз минглаб одамлар ҳалок бўлган ёки бедарак йўқолган.
Изоҳ (0)