Россия президенти Владимир Путин америкалик ҳамкасби Дональд Трамп билан телефон орқали мулоқоти чоғида унинг Украина президенти Владимир Зеленский билан учрашувини Москвада ўтказишни таклиф қилди. Бу ҳақда хабардор манбаларга таяниб, AFP хабар берди.
Трамп 18 август кунги учрашув вақти кутилмаганда Украина ва Европа делегациялари билан музокараларни тўхтатиб, Россия президентига қўнғироқ қилганди.
“Путин 18 август кунги суҳбатда Москвани тилга олди”, деди манбалардан бири.
Унинг сўзларига кўра, ўша пайтда Зеленский бунга рад жавобини берган. Путин дастлаб Украина президенти билан учрашишни, шундан сўнг Трамп иштирокида уч томонлама музокаралар ўтказишни таклиф қилган. Зеленский бунга тайёрлигини билдириб, ҳудудий масалалар муҳокама қилинишини таъкидлаган.
Ҳозирча Кремль Россия раҳбари украиналик ҳамкасби билан учрашишга тайёрлигини тасдиқламади. Путиннинг ёрдамчиси Юрий Ушаковга кўра, Россия томони музокараларда фақат “Москва ва Киев вакиллари даражасини ошириш имкониятини ўрганишга” тайёр.
Ҳозирда Женева ва Рим учрашув учун потенциал майдонлар сифатида кўриб чиқилмоқда. Швейцария вариантини Франция президенти Эммануэл Макрон таклиф қилганди. Мамлакат Ташқи ишлар вазирлиги агар Путин учрашув учун келса, ҳибсга олмасликка ваъда берган. Сабаби Халқаро жиноий суд (ХЖС) юрисдикциясига амал қилаётган давлатлар Россия президенти уларнинг ҳудудига келса, ҳибсга олиши керак.
Таъкидланишича, Россия томони Женевани, Трамп ва Зеленский эса Римни афзал кўрмоқда. Reuters суҳбатдошлари саммит Венгрияда бўлиб ўтиши мумкинлигини маълум қилган. Учрашувни яқин икки ҳафта ичида ташкил этиш режалаштирилган.
Трамп Украина президентини Путин билан эҳтимолий музокараларда “мослашувчанлик кўрсатишга” чақирмоқда. Шунингдек, Украина НАТОга аъзо бўлмаслигини, чунки бу масала Москвага ҳатто “Путиндан олдинги даврларданоқ” тақиқланган мавзу ҳисобланиши таъкидланган.
Изоҳ (0)