Грузия Украина ёки Молдовадан кўра кўпроқ Евроиттифоқ аъзолигига номзодлик мақомини олишга муносиб. Бу ҳақда Грузия бош вазири Ираклий Гарибашвили ҳукумат мажлисида маълум қилган.
Бош вазирнинг сўзларига кўра Тбилиси Киев ва Кишинёвни барча йўналишларда камида «ўнта тўп фарқи билан ортда қолдирмоқда», ҳатто бир қатор соҳаларда Европа иттифоқига аъзо мамлакатлардан ҳам ўзиб кетган.
«Агар иттифоқ аъзолигига номзодлик мақоми уруш билан белгиланадиган бўлса, биз бундай мақомни олмасликни афзал кўрамиз. Биз мазкур мақом адолатли равишда берилишини истаймиз», — деган Гарибашвили.
Шунингдек, Грузия ҳукумати раҳбари мамлакатнинг 30 йил давомида демократия ва ислоҳотлар учун олиб борган кураши, охирги тўққиз йилда ҳукумат олиб борган ишлар билан ЕИ аъзолигига муносиблигини таъкидлаган, дея хабар қилган Агенда.
Грузия март ойида Украинадан кейин Молдова билан биргаликда ЕИ аъзолигига қабул қилиниш учун сўров топширган. Мамлакатнинг Евроиттифоқ ҳамда НАТЎнинг хавфсизлик тузилмаларига кириш ташаббуси Грузия конституциясида белгилаб қўйилган.
Еврокомиссия Грузия, Украина ҳамда Молдованинг сўровлари бўйича қарорни 17 июнда чиқаришни режалаштирмоқда. Bloomberg нашрининг ўз манбаларига таяниб ёзишича Еврокомиссия Киевга қонун устуворлиги ва коррупцияга қарши курашиш тавсияси билан номзод мақомини бермоқчи. Шунга қарамай мазкур қарор Евроиттифоқнинг барча аъзоларининг розилиги билан чиқарилади.
Европа дипломатияси раҳбари Жозеп Боррел 13 июнь куни Украинага ЕИ аъзолигига номзодлик мақоми берилиши ҳақидаги саволга жавоб қайтариб, ўз қадриятларига, маданияти ва тарихига эга мамлакат ислоҳотлар ўтказган ҳолда Европага қўшилишга тайёргарлик кўргани, Евроиттифоқ эса ўз сарҳадларини янада кенгайтирмоқчи эканлигини қайд этган.
Мавзуга доир: Еврокомиссия Украинага ЕИга номзод мақомини бериш масаласини қўллаб-қувватламоқчи — Bloomberg
Изоҳ (0)