Жанубий Корея, АҚШ ва Япония Шимолий Кореянинг «ошиб бораётган ракета таҳдидларига» қарши туришга тайёргарликни кучайтириш учун қўшма машғулотлар ўтказишни режалаштирмоқда. Бу ҳақда Yonhap агентлиги манбаларга таяниб хабар бермоқда.
Манбаларга кўра, икки йилда бир марта ўтказиладиган Pacific Dragon машғулотлари 1—14 август кунларига мўлжалланган.
Қайд этилишича, бу йилги машғулотларда Канада ва Австралия ҳам иштирок этади.
Ракеталарни кузатиш машқларига қўшимча равишда Сеул, Вашингтон ва Токио жорий йил охирроғида ракета учиришларни кузатиш бўйича қўшма машғулотлар ўтказиши кутилмоқда.
Агентлик маълумотларига кўра, машғулотларни ўтказиш тўғрисида қарор Жанубий Корея мудофаа вазири Ли Чон Сопа, Пентагон раҳбари Ллойд Остин ва Япония мудофаа вазири Нобуо Киси ўртасида Сингапурда бўлиб ўтаётган «Шангри-Ла диалоги» хавфсизлик саммити доирасидаги учрашувда қабул қилинган.
Yonhap агентлигининг қайд этишича, бундай келишувларга КХДРнинг янги ядро синовларига тайёргарликни якунлаётганидан хавотирлар ортиб бораётган бир шароитда эришилган.
2022 йил бошидан бери Пхеньян ўнлаб ракета синовларини ўтказди.
Изоҳ (0)