АҚШ президенти Жо Байден Беларусь ҳукуматига қарши бир томонлама санкциялар режимини узайтирди. Тегишли ҳужжат Оқ уй сайтида нашр қилинди.
«Беларусга нисбатан миллий фавқулодда ҳолат тартибини яна бир йилга узайтираман», — дейилади Байден 13 июнь куни имзолаган ҳужжат матнида. Ҳужжат нусхаси Конгрессга юборилган.
Қайд этилишича, Беларусь ҳукуматидаги айрим кишиларнинг хатти-ҳаракатлари ва сиёсати, Беларусь режимининг зарарли фаолияти ва узоқ йиллик суиистеъмолликлар АҚШ миллий хавфсизлиги ва ташқи сиёсатига ғайриоддий ва фавқулодда хавф туғдиришда давом этмоқда. Бу эса Байденнинг санкцияларни узайтириш тўғрисидаги қарорига сабаб бўлган.
Аввалроқ The Wall Street Journal АҚШ озиқ-овқат инқирозини ҳал қилиш учун Беларусдан санкцияларни олиб ташламоқчи экани ҳақида ёзганди. Мамлакат бу қарор Беларусь президенти Александр Лукашенконинг позициясини юмшатишини ҳамда Украина ғалласининг Беларусь ҳудуди орқали экспорт қилинишига йўл очишини тахмин қилган.
Изоҳ (0)