Россиялик бизнесменларнинг шахсий самолётлари ва вертолётлари санкцияларга қарамай, Европа Иттифоқи (ЕИ) ҳудуди узра парвозни давом эттирмоқда, деб ёзади Welt am Sonntag парвозларни кузатиш хизматлари маълумотларига таяниб. Европа Иттифоқининг санкциялари жорий этилганидан буён Европа осмонида россияликларга тегишли бўлган 30 га яқин самолёт парвоз қилган.
Welt am Sonntag хабарига кўра, март ойи ўрталарида Британия расмийлари G-LАТО давлат рақамига эга Cessna самолётининг парвозини тўхтатиб қолган. Лайнер гўёки «нефть миллиардери» Евгений Швидлерга тегишли бўлган. Лондонда мусодара қилинишидан олдин тадбиркорнинг шахсий самолёти Европа Иттифоқи ҳудудидан саккиз марта учиб ўтган, деб ёзади газета.
Бундан ташқари, Сан-Маринода рўйхатдан ўтган ва Швейцария компанияси томонидан бошқариладиган Т7-7АА давлат рақамига эга Bombardier самолёти 2 март куни Ниццадан Истанбулга учган. Газетанинг ёзишича, лайнер бизнесмен Алберт Авдолянга тегишли. Виктор Векселбергга алоқадор ва Люксембургда рўйхатдан ўтган самолёт апрель ойида Базелдан чиқиб, Нур-Султонга учган. Бизнесмен Александр Занадворовнинг вертолёти эса Франция узра камида саккиз марта учиб ўтган.
«Россиядан ташқарида рўйхатдан ўтган ва Россияники бўлмаган компанияларга тегишли бизнес-жетлар ва вертолётларга нисбатан санкцияларни қўллаш мулкчиликнинг ношаффоф тузилмалари туфайли баъзан қийин кечади», — дея тушунтирди нашрга Европа Иттифоқининг исми ошкор этилмаган расмийси.
Европа Иттифоқи ва АҚШ Россия самолётлари учун осмонини ёпган. Санкциялар 24 февраль куни Владимир Путин томонидан Украинада бошланган ҳарбий амалиётга жавобан жорий қилинган. Ғарб санкция рўйхатига россиялик амалдорлар ва тадбиркорларни ҳам киритди, бу уларнинг хориждаги барча активлари музлатилишини англатади. Россиялик ишбилармонларнинг музлатилган мулки умумий қиймати май ойининг охирига келиб 10 миллиард еврони ташкил этди.