Маҳаллий губернатор, Сергей Гайдайнинг сўзларига кўра, ҳозирда Украинанинг қуролли кучлари жойлашган Северодонецк шаҳрига олиб борувчи барча кўприклар вайрон қилинган.
Губернаторнинг айтишича, шаҳар амалда узилиб қолганлиги сабабли юкларни етказиб бериш ва тинч аҳолини эвакуация қилиш имконсиз бўлиб қолмоқда.
Шаҳарнинг шарқий қисмида шиддатли жанглар давом этмоқда, Украина расмийлари маълум қилишича Россия артиллерияси уларни шаҳар марказидан сиқиб чиқаряпти.
Бир неча ҳафтадан буён Северодонецкни босиб олиш Россиянинг асосий ҳарбий мақсади бўлин қолмоқда.
Северодонецк ва унга яқин жойлашган Лисичанск шаҳрини қўлга киритиш Москвага бутун Луганск вилоятини назорат қилиш имконини беради, вилоятнинг катта қисми аллақачон россияпараст айирмачилар томонидан назорат қилинади.
«Северодонецкка борадиган учта кўприк ҳам вайрон бўлди», деб ёзди Гайдай ўз Telegram саҳифасида. Унинг қўшимча қилишича, шаҳарда қолган аҳоли «ўта оғир шароитларда» яшашга мажбур.
Шаҳарни ҳимоя қилиш учун жангда ҳалок бўлганлар орасида собиқ британ аскари Жордан Гатли ҳам борлигини унинг оиласи якшанба куни тасдиқлади.
Украина президенти Владимир Зеленский шаҳар учун жангнинг инсоний қийматини «даҳшатли» деб атади. Унга сўзларига кўра, Украина қўшинлари рус армияси билан том маънода «ҳар бир метр учун» жанг қилмоқда.
Маълумотларга кўра, ҳозирда шаҳарнинг 70 фоизга яқин қисми Россия назорати остида.
Шаҳарда қолган Украина қўшинлари «таслим бўлиши ёки ўлиши керак», деди ўзини ўзи мустақил деб эълон қилган россияпараст Донецк халқ республикаси ҳарбий вакили.
ДНР раҳбари Эдуард Басурин Донецкда ОАВ билан суҳбатда: «У ерда (Северодонецк) бўлган Украина бўлинмалари ўша ерда абадий қолади», деган.
Изоҳ (0)