6—12 июнь кунлари Тошкент шаҳрида Tashkent Art Festival-2022 санъат фестивали ташкил этилди. 6—9 июнь оралиғида эса мазкур фестиваль доирасида пойтахтнинг бир қатор ҳудудлари, жумладан, Ислом Каримов номидаги Халқаро аэропорт, метрополитен, Nest One биноснинг энг юқори қавати, истироҳат боғлари, меҳмонхоналар ва ресторанларда жамоатчилик рассомларнинг бевосита асар яратиш жараёни ҳамда санъат кўргазмаларига гувоҳ бўлиши мумкин эди.
«Дарё» фотомухбири ана шундай масканларнинг айримларига бориб, иштирокчилар билан суҳбатлашди. Биринчи манзил метрополитеннинг «Алишер Навоий» бекати бўлди.
Исломбек Парпибоев, Камолиддин Беҳзод номидаги миллий рассомлик ва дизайн институти, 2-босқич талабаси
Рассомчиликка қизиқиб, шуғуллана бошлаганимга 6-7 йил бўлди. Қизиқишларимни дадам доим қўллаб-қувватлаб келадилар. Шу вақтгача минглаб картиналар чиздим, дея оламан. Асосан маҳобатли ранг-тасвир йўналишида, манзара, тарихий, маиший жанрларда чизаман ва шу турдаги картиналарга қизиқаман. Метрополитенда 2 кундан буён тушдан кейин келиб, муҳитдан илҳомланган ҳолда расм чизяпмиз. Мен иккинчи картинамга киришдим. Айтишим керакки, метро шовқини асло бизга ҳалақит бермайди, аксинча ундан илҳомланиб асар яратишимизга туртки бўлди.
Ёқутхон Комилова, Камолиддин Беҳзод номидаги миллий рассомлик ва дизайн институти, 2-босқич талабаси.
Хоразмликман, рассомчиликка 7-синфдан бери қизиқиб, шуғулланиб келаман. Соҳага бўлган қизиқишларимни ота-онам ҳамда устозим Ҳадича опа қўллаб, ёрдам беришган. Шу вақтгача жуда кўп расм чизганман, аниқ сонини санаб бера олмайман. Кўпроқ манзара, маиший йўналишлар, портретлар чизишни ёқтираман. Чизаётган расмларимиз мазмуни шу метро, ундаги жараёнлар, одамларнинг поезд кутгандаги ҳаракатларини акс эттиришдан иборат. Келгусида чизган расмларимни сотувга қўйишни ҳам режалаштиряпман.
Носирбек Абдуваҳобов, Камолиддин Беҳзод номидаги миллий рассомлик ва дизайн институти, 2-босқич талабаси
Ўзим андижонликман, 12 ёшимдан рассомчиликка қизиқаман. Ота-онамнинг қўллаб-қувватлаши сабаб шу йўналишда, дастлаб, Болалар мусиқа ва санъат мактабида 4 йил, Андижон ихтисослаштирилган санъат мактабида 1 йил, Бенков номидаги Республика рассомлик коллежида 3 йил ўқидим. Асосан реализмга қизиқаман, яъни реал ҳаётдан илҳомланиш ёқади. Чизган расмларимни сотаман, ишларимни 300-400 долларга баҳолайман. Ўзбек рассомларидан Баҳодир Жалолов, чет эл рассомларидан Рембрандт, Николай Фешин, Иля Репин каби рассомларнинг ижодига қизиқиб кузатиб бораман.
3 кундан буён метрода ижод қиляпмиз. Режа бўйича битта картинани битириб беришимиз керак. Менга бу ердаги муҳит ёқяпти.
Мирзоҳид Шамсиддинов, Камолиддин Беҳзод номидаги миллий рассомлик ва дизайн институти, 2-босқич талабаси
Аслида рассомчиликка боғча ёшидан қизиққанман. Ота-онамнинг кўмаги билан 14-15 ёшимдан буён жиддий шуғулланиб чизиб келаман. Сифат жиҳатидан айтадиган бўлсам, шу вақтгача 100-200 та картина яратдим. Ўзимизнинг рассомлардан Баҳодир Жалолов ҳамда Алишер Алиқулов, чет эл рассомларидан эса Валентин Сиров, Константин Коровин, Иля Репин, Исаак Левитан, Рембрандт ижодига қизиқаман. Реализм йўналишидаги ишларни яратишни хуш кўраман. Ишларимни ўртача 300-500 долларга баҳолайман.
Tashkent Art Festivalда рассомлар жуда фаол иштирок этмоқда. Ташкил қилганларнинг барчасига раҳмат, демоқчиман. Сабаби бундай тадбирлар ёш ижодкорларнинг ишларини халққа таништиришда муҳим рол ўйнайди, омманинг эътиборини миллий санъатимизга жалб қилади. Метрода 3 кундан буён чизаётган бўлсак, одамларнинг шовқинини сезмадик ҳам. Чунки бирор асар яратиш жараёнида ишимизга шўнғиб кетамиз ва атрофни унутамиз. Йўловчилар бу орада келиб биздан қандай мавзуда чизаётганимиз, картиналаримизни сотамизми йўқми, шу каби турлича саволлар билан мурожаат қилишди. Тилагим шуки, оммани санъат билан таништирадиган шундай фестиваллар ҳар ойда бўлсин.
10 июнь куни санъат фестивали доирасида Ботаника боғида уюштирилган флешмоб шаклидаги танловда турли ўқув муассасаларидан келган 700 нафар ёш рассомлар қатнашди. Ҳакамлар ҳайъати кузатуви остида мўйқалам усталари ўз тасаввурларидаги Тошкент шаҳрини холстга тушириши талаб қилинар эди. Танловда Камолиддин Беҳзод номидаги миллий рассомлик ва дизайн институти, Республика ихтисослаштирилган санъат интернат-мактаби ўқувчилари, Ўзбекистон бадиий академияси аъзолари, П.Бенков номидаги Республика ихтисослаштирилган рассомлик коллежи вакиллари ижод намуналарини яратишди.
Тадбир ҳақида фикр билдирар экан, санъатшунос Элмира Аҳмедова «Ўзи аслида бизда доимий равишда танлов ва кўргазмалар ўтказиб келинади. Аммо бугунги тадбир бошқаларидан ажралиб туради. Бугунги мавзуни ёшларимиз қандай очиб беради билмадим-у, аммо шаҳримизга бўлган янгича нигоҳларни кашф этишимизга ишончим комил», дея таъкидлаб ўтди.
Танлов низомига кўра 3-ўрин соҳиби график планшет, 2-ўрин соҳиби Нукусга 2 кишилик саёҳат ҳамда Савитский музейига экскурсия, 1-ўрин соҳиби Москвага 2 кишилик (3 кун) йўлланма ва Третяков галереясига экскурсия, гран-при соҳиби эса Абу-Даби шаҳрига 2 кишилик (3 кун) йўлланма ва «Лувр Абу-Даби» музейига экскурсия ютиб олиши мумкин эди.
11-12 июнь куни Тошкентнинг қоқ марказидаги «Мовий гумбазлар» боғида Арт фестиваль якунларига бағишланган тадбирлар доирасида шаҳар аҳли ва меҳмонлар Ўзбекистоннинг 1000дан ортиқ рассомлари ижод намуналаридан иборат кўргазма, ютуқли ўйинлар, концерт дастурларидан баҳраманд бўлди. Боғда намойиш этилган санъат асарлари турли жанр ва йўналишларда эди.
Шу ернинг ўзида фестиваль иштирокчиларининг 20 нафари эсдалик совғалари ва фахрий ёрлиқлар билан тақдирланиб, асосий ўринларнинг ғолиблари аниқланди. Шу тарзда:
Гран-при: Рустамбек Қурбонов
1-ўрин: Беҳзод Мирвасилов
2-ўрин: Рисолат Ҳасанова
3-ўрин: Ҳасан Азимжонов
Изоҳ (0)