Қашқадарё вилоятининг Чироқчи туманида артизан қудуққа тушиб кетган бола қутқарилгани тўғрисида хабар берилганди. ФВВ матбуот хизмати қудуқдан қутқариб олинган бола тўғрисида қўшимча маълумот берди.
12 июнь куни соат 14:01 ларда туманнинг Лангар қишлоғида 6 ёшли бола фуқаро дала майдонида қазилган, 200 диаметрли сувсиз артизан қудуққа тушиб кетган. Воқеа жойига зудлик билан вилоят ФВБ қутқарувчилари ва тегишли хизматлар куч-воситалари етиб борган. Қутқариш ишларига ФВБ махсус техникалари, яъни экскаватор ва грейдер жалб этилган. Олиб борилган махсус қутқариш операцияси натижасида бола 13 июнь куни соат 10:25 да қутқариб олинган.
Маълум қилинишича, махсус қутқарув операциясида «Қалқама» маҳалласида яшовчи 109-сонли мактабнинг 8-синф ўқувчиси Озодбек Йўлдошев ҳам қатнашди. Кичик қаҳрамон қутқарувчилар ва махсус асбоб-анжомлар ёрдамида қудуқнинг тор туйнугидан ўтиб, болакайни олиб чиққан.
«Ўз навбатида, ёш халоскор қаҳрамон — Озодбекка барча юртдошларимиз қатори Фавқулодда вазиятлар вазирлиги улкан миннатдорлик билдиради», — дейилади хабарда.
Таъкидланишича, ўз вақтида ва тезкор олиб борилган қутқарув операцияси муваффақиятли якунланиб, болажон ҳаёти сақлаб қолинган, айни вақтда болакай шифокорлар назоратида, ота-онаси бағрида.
Бундан олдин Сирдарё дарёсидаги оролчада машинаси билан қолиб кетган фуқаро қутқарилгани тўғрисида хабар берилганди.
Изоҳ (0)