6—12-iyun kunlari Toshkent shahrida Tashkent Art Festival-2022 san’at festivali tashkil etildi. 6—9 iyun oralig‘ida esa mazkur festival doirasida poytaxtning bir qator hududlari, jumladan, Islom Karimov nomidagi Xalqaro aeroport, metropoliten, Nest One binosning eng yuqori qavati, istirohat bog‘lari, mehmonxonalar va restoranlarda jamoatchilik rassomlarning bevosita asar yaratish jarayoni hamda san’at ko‘rgazmalariga guvoh bo‘lishi mumkin edi.
“Daryo” fotomuxbiri ana shunday maskanlarning ayrimlariga borib, ishtirokchilar bilan suhbatlashdi. Birinchi manzil metropolitenning “Alisher Navoiy” bekati bo‘ldi.
Islombek Parpiboyev, Kamoliddin Behzod nomidagi milliy rassomlik va dizayn instituti, 2-bosqich talabasi
Rassomchilikka qiziqib, shug‘ullana boshlaganimga 6-7 yil bo‘ldi. Qiziqishlarimni dadam doim qo‘llab-quvvatlab keladilar. Shu vaqtgacha minglab kartinalar chizdim, deya olaman. Asosan mahobatli rang-tasvir yo‘nalishida, manzara, tarixiy, maishiy janrlarda chizaman va shu turdagi kartinalarga qiziqaman. Metropolitenda 2 kundan buyon tushdan keyin kelib, muhitdan ilhomlangan holda rasm chizyapmiz. Men ikkinchi kartinamga kirishdim. Aytishim kerakki, metro shovqini aslo bizga halaqit bermaydi, aksincha undan ilhomlanib asar yaratishimizga turtki bo‘ldi.
Yoqutxon Komilova, Kamoliddin Behzod nomidagi milliy rassomlik va dizayn instituti, 2-bosqich talabasi.
Xorazmlikman, rassomchilikka 7-sinfdan beri qiziqib, shug‘ullanib kelaman. Sohaga bo‘lgan qiziqishlarimni ota-onam hamda ustozim Hadicha opa qo‘llab, yordam berishgan. Shu vaqtgacha juda ko‘p rasm chizganman, aniq sonini sanab bera olmayman. Ko‘proq manzara, maishiy yo‘nalishlar, portretlar chizishni yoqtiraman. Chizayotgan rasmlarimiz mazmuni shu metro, undagi jarayonlar, odamlarning poyezd kutgandagi harakatlarini aks ettirishdan iborat. Kelgusida chizgan rasmlarimni sotuvga qo‘yishni ham rejalashtiryapman.
Nosirbek Abduvahobov, Kamoliddin Behzod nomidagi milliy rassomlik va dizayn instituti, 2-bosqich talabasi
O‘zim andijonlikman, 12 yoshimdan rassomchilikka qiziqaman. Ota-onamning qo‘llab-quvvatlashi sabab shu yo‘nalishda, dastlab, Bolalar musiqa va san’at maktabida 4 yil, Andijon ixtisoslashtirilgan san’at maktabida 1 yil, Benkov nomidagi Respublika rassomlik kollejida 3 yil o‘qidim. Asosan realizmga qiziqaman, ya’ni real hayotdan ilhomlanish yoqadi. Chizgan rasmlarimni sotaman, ishlarimni 300-400 dollarga baholayman. O‘zbek rassomlaridan Bahodir Jalolov, chet el rassomlaridan Rembrandt, Nikolay Feshin, Ilya Repin kabi rassomlarning ijodiga qiziqib kuzatib boraman.
3 kundan buyon metroda ijod qilyapmiz. Reja bo‘yicha bitta kartinani bitirib berishimiz kerak. Menga bu yerdagi muhit yoqyapti.
Mirzohid Shamsiddinov, Kamoliddin Behzod nomidagi milliy rassomlik va dizayn instituti, 2-bosqich talabasi
Aslida rassomchilikka bog‘cha yoshidan qiziqqanman. Ota-onamning ko‘magi bilan 14-15 yoshimdan buyon jiddiy shug‘ullanib chizib kelaman. Sifat jihatidan aytadigan bo‘lsam, shu vaqtgacha 100-200 ta kartina yaratdim. O‘zimizning rassomlardan Bahodir Jalolov hamda Alisher Aliqulov, chet el rassomlaridan esa Valentin Sirov, Konstantin Korovin, Ilya Repin, Isaak Levitan, Rembrandt ijodiga qiziqaman. Realizm yo‘nalishidagi ishlarni yaratishni xush ko‘raman. Ishlarimni o‘rtacha 300-500 dollarga baholayman.
Tashkent Art Festivalda rassomlar juda faol ishtirok etmoqda. Tashkil qilganlarning barchasiga rahmat, demoqchiman. Sababi bunday tadbirlar yosh ijodkorlarning ishlarini xalqqa tanishtirishda muhim rol o‘ynaydi, ommaning e’tiborini milliy san’atimizga jalb qiladi. Metroda 3 kundan buyon chizayotgan bo‘lsak, odamlarning shovqinini sezmadik ham. Chunki biror asar yaratish jarayonida ishimizga sho‘ng‘ib ketamiz va atrofni unutamiz. Yo‘lovchilar bu orada kelib bizdan qanday mavzuda chizayotganimiz, kartinalarimizni sotamizmi yo‘qmi, shu kabi turlicha savollar bilan murojaat qilishdi. Tilagim shuki, ommani san’at bilan tanishtiradigan shunday festivallar har oyda bo‘lsin.
10-iyun kuni san’at festivali doirasida Botanika bog‘ida uyushtirilgan fleshmob shaklidagi tanlovda turli o‘quv muassasalaridan kelgan 700 nafar yosh rassomlar qatnashdi. Hakamlar hay’ati kuzatuvi ostida mo‘yqalam ustalari o‘z tasavvurlaridagi Toshkent shahrini xolstga tushirishi talab qilinar edi. Tanlovda Kamoliddin Behzod nomidagi milliy rassomlik va dizayn instituti, Respublika ixtisoslashtirilgan san’at internat-maktabi o‘quvchilari, O‘zbekiston badiiy akademiyasi a’zolari, P.Benkov nomidagi Respublika ixtisoslashtirilgan rassomlik kolleji vakillari ijod namunalarini yaratishdi.
Tadbir haqida fikr bildirar ekan, san’atshunos Elmira Ahmedova “O‘zi aslida bizda doimiy ravishda tanlov va ko‘rgazmalar o‘tkazib kelinadi. Ammo bugungi tadbir boshqalaridan ajralib turadi. Bugungi mavzuni yoshlarimiz qanday ochib beradi bilmadim-u, ammo shahrimizga bo‘lgan yangicha nigohlarni kashf etishimizga ishonchim komil”, deya ta’kidlab o‘tdi.
Tanlov nizomiga ko‘ra 3-o‘rin sohibi grafik planshet, 2-o‘rin sohibi Nukusga 2 kishilik sayohat hamda Savitskiy muzeyiga ekskursiya, 1-o‘rin sohibi Moskvaga 2 kishilik (3 kun) yo‘llanma va Tretyakov galereyasiga ekskursiya, gran-pri sohibi esa Abu-Dabi shahriga 2 kishilik (3 kun) yo‘llanma va “Luvr Abu-Dabi” muzeyiga ekskursiya yutib olishi mumkin edi.
11-12 iyun kuni Toshkentning qoq markazidagi “Moviy gumbazlar” bog‘ida Art festival yakunlariga bag‘ishlangan tadbirlar doirasida shahar ahli va mehmonlar O‘zbekistonning 1000dan ortiq rassomlari ijod namunalaridan iborat ko‘rgazma, yutuqli o‘yinlar, konsert dasturlaridan bahramand bo‘ldi. Bog‘da namoyish etilgan san’at asarlari turli janr va yo‘nalishlarda edi.
Shu yerning o‘zida festival ishtirokchilarining 20 nafari esdalik sovg‘alari va faxriy yorliqlar bilan taqdirlanib, asosiy o‘rinlarning g‘oliblari aniqlandi. Shu tarzda:
Gran-pri: Rustambek Qurbonov
1-o‘rin: Behzod Mirvasilov
2-o‘rin: Risolat Hasanova
3-o‘rin: Hasan Azimjonov
Izoh (0)