Иена долларга нисбатан йигирма йилдаги энг паст даражага тушиб кетди. Бу ҳақда Bloomberg хабар бермоқда.
Япония банки йирик марказий банклар орасида инфляцияни барқарор асосда жонлантириш учун энг паст фоиз ставкаларини сақлаб қолиш мажбурияти билан ажралиб туради.
Дунёнинг аксарият мамлакатларида нархларнинг ўсиши ҳаттоки АҚШ Федерал захира тизимини ҳам ставкаларни оширишга ундамоқда.
Иенанинг кучсизланиши иқтисод, корхоналар ва истеъмолчиларга фойда ҳам, зарар ҳам келтириши мумкин. Бироқ унинг кескин пасайиши давлатнинг валюта бозорларига аралашуви эҳтимолини оширади.
Нега иена бунчалик заифлашди?
Энг катта сабаб — АҚШда фоиз ставкалари ошиш эҳтимоли кўтарилгани. Бу доллардаги активларни юқори даромад олишни истаган инвесторлар учун янада жозибадор қилади. Трейдерлар Федерал резерв тизимини ставкаларни оширишига тикишда давом этмоқда.
Япония ўз иқтисодиётини пандемиядан олдинги ҳажмига қайтариш учун тенгдошларидан орқада қолишда давом этмоқда. Мамлакат савдо баланси салбий кўрсаткичда қолиши ҳам заиф иенага таъсир қилиши мумкин.
Заиф иена иқтисодиёт учун нимани англатади?
Япония собиқ бош вазири Синдзо Абэ сўнгги ўн йилликда дефляция таҳдидининг қисман олдини олиш учун иенанинг қадрсизлантириш даврини бошлаб берган эди. Дунё эса бу ҳаракатни олқишлаган эди.
Арзонроқ иена экспортчиларга, шу жумладан, автомобилсозлик гиганти Toyota Motor компаниясига хориждан олган даромадларини ватанига қайтаришда ёрдам беради.
Бу Японияни пандемия давридан ташқарида хорижликлар учун арзонроқ саёҳат жойига айлантириб, меҳмондўстлик сектори ва минтақавий иқтисодларга туристик пул олиб келади.
Энди вазият ўзгариб бормоқда. Товарлар ва бошқа маҳсулотлар нархи ўнлаб йиллар ичида энг тез суръатлар билан ўсиб бормоқда, бу эса импортга таянадиган корхоналарнинг даромадларини сиқиб чиқаришига олиб келади.
Шу билан бирга, ҳамма энергия нархининг ошишидан қийналмоқда. Хориждан олиб келинган озиқ-овқат ва бошқа кундалик эҳтиёжлар нархининг кўтарилиши истеъмолчиларни қийин аҳволга солиб қўйган.
Япония аста-секин чет эллик меҳмонлар учун ўз чегараларини очаётган бўлса-да, бундан ҳар қандай иқтисодий фойда ҳозирча чекланган бўлади.
Нима учун Япония ставкаларни оширмайди?
Япония Марказий банки губернатори Харухико Курода инфляция нисбатан суст эканлиги учун ставкаларни оширишга ҳали эрта эканлигини айтди.
Апрель ойида Япониянинг бенчмарк инфляция кўрсаткичи Марказий банкининг 2 фоиз мақсадидан 2,1 фоизга ўсди.
Таққослаш учун, АҚШда истеъмол нархлари 8 фоиздан кўпроқ ўсиб бормоқда. Курода июнь ойида ставкаларни ўзгартирмаслигини таъкидлаган бўлса-да, бу қарор ўзгариши мумкин.
Аввалроқ тобора заифлашаётган валюта Япония иқтисодиётини қутқариши ёки чўктириши ҳақида хабар берилганди.
Изоҳ (0)