Санкциялар сабаб Россиядаги компаниялар қарийб 60 млрд доллар йўқотди

Дунё компаниялари санкциялардан кейин Россиядаги операцияларидан 59 млрд доллардан кўпроқ зарар кўрди. Бу ҳақда Wall Street Journal хабар бермоқда.

Европа Иттифоқи тадқиқотчиларининг фикрига кўра, мингдан ортиқ Ғарб бизнеслари Украинага бостириб кириши ортидан Россиядаги фаолиятини тўхтатишга ваъда берганди.

Кўплаб банклар ҳамда пиво ишлаб чиқарувчиларидан тортиб, ресторанлар ва ҳатто ўрмон хўжаликларигача бўлган бир қатор соҳалар катта зарар кўрмоқда.

Фаст фуд гиганти McDonald’s Россиядаги ресторанларини маҳаллий лицензия эгасига сотишга рози бўлганидан кейин 1,4 млрд доллар атрофида маблағ йўқотди.

Exxon мобил компанияси Россиянинг шарқий ҳудудларидаги нефть ва газ лойиҳасида фаолиятини тўхтатганидан кейин 3,4 млрд доллар зарар кўрди.

Budweiser пиво ишлаб чиқарувчиси AB InBev компанияси Россия қўшма корхонасидаги ўз улушини сотишга қарор қилиб, 1,1 млрд доллар пул йўқотди.

Буюк Британиянинг йирик нефть компанияси BP PLC Россиядан кетишига қарор қилганидан кейин ўтган ойда умумий 25,5 млрд долларлик тўлов мажбуриятини олди.

Келгуси ойларда янада кўпроқ Россия билан боғлиқ бошқа тўлов мажбуриятлари бўлиши кутилмоқда, чунки компаниялар мамлакатдан чиқиб кетишнинг якуний босқичини бошлаган.

Бухгалтерларнинг фикрига кўра, санкциялар сабаб Россияни тарк этиши кутилаётган компаниялар зарар қанчалик катта бўлишини ҳисоблаб чиқмагунча мамлакатдан кетмай туриши мумкин.

Uber’га ўхшаган компаниялар ўз фаолиятини қисқартириш орқали секинлик билан Россиядаги бизнесини тўхтатишга уринмоқда.

Аввалроқ Европа Россия газини санкцияларни бузмасдан сотиб олиш режасини ишлаб чиққани ҳақида хабар берилган эди.