Андижон шаҳар «Янги бозор» савдо мажмуасида одамларга навбат билан арзонлаштирилган шакар сотиш жараёнини тасвирга олишга уринган журналистнинг телефони тортиб олинди. Бу ҳақда «Human.uz» нашри хабар берди.
Маълум қилинишича, 3 июнь соат 09:50 да «Янги бозор» савдо мажмуасида Илёс исмли Андижон ИИБ ходими томонидан шакар савдосини суратга олаётган «Human.uz» ходимининг хизмат телефони видеога олиш қонунга зид деган иддао билан куч ишлатиш йўли билан тортиб олинган. «Бир қанча уринишлардан сўнг ҳам смартфон қайтариб берилмаяпти. Ягона шарти – куч ишлатиш йўли билан олинган ва ИИБ ходимининг куч ишлатгани ҳамда телефонни тортиб олгани суратга олинган видеони ўчириб юбориш экан», — дейилади хабарда.
ИИВ матбуот котиби Шоҳрух Ғиёсовнинг маълум қилишича, ИИБ ходимлари фуқароларнинг талабидан келиб чиқиб, журналистдан видеони ўчиришни сўраган.
Ғиёсовга кўра, фуқаро Ж.Абдуллаев одамларнинг навбатини ва ўзаро гап талашаётганини тасвирга олиш вақтида, фуқаролар томонидан уларнинг юзларини тасвирга олишига эътироз билдирилиб, ҳуқуқларини поймол қилмасдан тасвирни ўчириб ташлаш талаб қилинган.
Жамоат тартибини бузилишини олдини олиш мақсадида, бозор ҳудудига бириктирилган ички ишлар органлари ходими томонидан фуқаро Ж.Абдуллаевга фуқароларни розилигисиз уларни тасвирга олмаслик тушунтирилган.
«Ҳозирда, шакарга навбатда турган фуқаролар ва Ж.Абдуллаев ўртасидаги зиддиятга ойдинлик киритиш мақсадида воқеа иштирокчилари ИИБга олиб борилган», — дейилади муносабатда.
Олий Мажлис Қонунчилик палатаси депутати Расул Кушербаев ҳам содир бўлган воқеа муносабат билдириб, қонунда журналистларга нисбатан босим ва таҳдид тақиқланган бўлса-да, бироқ бунинг учун алоҳида жавобгарлик шу кунга қадар белгиланмаганини қайд этган.
«Журналист воқеа ҳодисаларни тасвирга олишда умумий фондаги фуқароларнинг ҳар бирининг юзини тасвирга тушишига улардан рухсат олиши қонунда йўқ. Кимки истамаса, камерадан юзини буриши мумкин. Ёки видео тарқатилишидан олдин журналистдан ўзининг юзини кўрсатмасликни сўраши мумкин. Ахборот тўплаб, тарқатиш журналистнинг профессионал фаолияти ҳисобланади. Фуқаронинг сўрови қониқтирилмаган тақдирда фуқаро бу бўйича фуқаролик судига мурожаат қилишга ҳақли.
Ички ишлар вазирлиги вакилининг ИИБ ходимларининг журналистдан мажбуран тасвирга олиш ускунасини тортиб олган ҳолатини бу тарзда хаспўшлаши абсурд ва мантиқсиз. Бундай услуб ички ишлар тизими обрўсини оширмайди, билъакс тўкади. Балки вазирни шахсан ўзлари бунга эътибор қилиши керакдир», — деб ёзади Кушербаев.
Изоҳ (0)