Қашқадарё вилоятининг Ғузор туманидаги хонадонда эшак сўйилаётгани ҳақида хабар берилганди. Туман ҳокимлиги ахборот хизматининг «Дарё»га маълум қилишича, ҳолат юзасидан қонунбузарларга суд қарори эълон қилинган.
Эшак сўйиш иши туманнинг «Эшонқудуқ» маҳалласи Абдуҳамид қишлоғидаги хонадонлардан бирида содир бўлган эди. Ғузор тумани ҳокими Бекзод Суюнов кенг жамоатчилик билан ҳолатни муҳокама қилган.
Жиноят ишлари бўйича Нишон тумани суди томонидан ўз хонадонида эшак сўйишни касб қилиб олган фуқаро Н.Р. ва унинг турмуш ўртоғи С.А.нинг хатти-ҳаракатлари кўриб чиқилиб, суд ҳукми ўқилган.
Суд қарорига кўра, фуқаро Н.Р.га нисбатан Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабатда бўлиш) 2-қисми ва 161-моддаси (шаҳарларни ва бошқа аҳоли пунктларини ободонлаштириш қоидаларини бузиш) билан 10 сутка қамоқ жазоси тайинланган. С.А.га нисбатан эса шу кодекснинг 111-моддасига асосан энг кам иш ҳақининг 2 баробари миқдорида жарима белгиланган.
Шунингдек, хонадонда эшак сўйиш ҳолати ҳақида хабар берган фуқаро А.Ш.га кўрсатилган тан жароҳати ва ҳақорат юзасидан фуқаро С.А.га нисбатан суриштирув ҳаракатлари олиб борилмоқда.
Аввалроқ Қашқадарёда эшак сўйиш билан шуғулланган тўрт киши ушлангани, Андижонда итларни сўйиб, истеъмол қилиш билан шуғулланиб келган шахс қўлга олингани ҳақида хабар берилган.
Изоҳ (0)