Абдулла Авлоний номидаги миллий-тадқиқот институти мактаб битирувчилари орасида келажакдаги режалари ҳақида сўровнома ўтказди. 10 кун давом этган сўровноманинг дастлабки кўрсаткичлари эълон қилинди.
Қайд этилишича, сўровномада 17,1 минг нафар ўқувчи иштирок этган. 2021/2022-ўқув йилини тамомлаётган 11-синф битирувчиларининг 67 фоизи аллақачон касб ёки соҳаларини танлаб қўйганини билдирган. Уларнинг ярмидан кўпроғи, аниқроғи, 57 фоиз қисми ўз истагига кўра касб танламоқда. Бу борада энг паст кўрсаткич 6 фоизни ташкил этиб, улар ўзларини тўғри келган соҳада синаб кўрмоқчи. 11 фоизи ота-онаси хоҳишига кўра, 16 фоизи муваффақиятли инсонларга ҳавас қилиб касб танлайди.
Сўровнома таҳлилларининг кўрсатишича, респондентларнинг асосий қисми педагогика ва психология соҳасида фаолият юритиш мақсади борлигини айтишган бўлиб, улар 20,9 фоизни ташкил этади. Шунингдек, касб танлаган битирувчиларнинг 9,1 фоизи ҳуқуқшуносликни, 5,1 фоизи эса АКТни танлаганини билдирган. Энг қуйи кўрсаткич ижодий соҳаларда экани қайд этилган — 1,4 фоиз. Ҳунарлар ичида энг баланд кўрсаткич ижтимоий хизмат соҳалари (сартарош, тикувчи, косметолог ва бошқалар)да (3,7 фоиз), энг қуйи натижа эса фермерлик, деҳқончилик, ҳунармандчилик ва устачиликда (0,9 фоиз) экани келтириб ўтилган.
«Олиб борилган тадқиқотдан маълум бўлдики, Ўзбекистонда 100 дан ортиқ касб мавжуд бўлса-да, битирувчилар бор-йўғи 20 га яқин касб ҳақида тасаввурга эга экан. Энг ачинарлиси, 18 та фан ўқитувчилари билан суҳбатлашилганда, уларнинг ўз соҳаси бўйича битирувчиларга берадиган тавсияси энг кўпи билан 5-6 та касбни ташкил этмоқда», — дейилади хабарда.
Тадқиқот натижасида битирувчиларнинг бешдан бир қисми педагогика ва психология касбини танлашини айтган. Бу жами битирувчиларга нисбатан 81 500 нафарни ташкил этади. Аммо ҳозирги вақтда республика мактабларида фанлар (23 та) бўйича педагог кадрларга бўлган жами эҳтиёж 6200 нафарга яқин, холос. Оқибатда 75300 нафар битирувчининг тақдири номаълумлигича қолмоқда.
Бундан ташқари, таҳлилларда келажаги ҳақида аниқ тасаввурга эга деб ҳисобланган 67 фоиз битирувчининг кўпчилиги касб-ҳунарлар ҳақида етарлича маълумотга эга эмас.
Ҳозирда умумий ўрта таълим мактаблари битирувчилари ҳақидаги тадқиқотлар давом этмоқда.
Изоҳ (0)