Абдулла Авлоний номидаги миллий-тадқиқот институти мактаб битирувчилари орасида келажакдаги режалари ҳақида сўровнома ўтказди. Ўқувчиларнинг айримлари мактабни тугатгач хорижга кетмоқчи эканини билдирган.
Қайд этилишича, сўровномада 17,1 минг нафар ўқувчи иштирок этган. Уларнинг 67 фоизи аллақачон касб ёки соҳаларини танлаб қўйганини билдирган бўлса-да, 6 фоиз қисми келгуси режаларини ҳозирдан режалаштиришга ҳали эрта деб ҳисоблашини ҳамда шахсий ҳаёт, оила қуришни режалаштираётганини таъкидлаган. 11 фоиз битирувчи эса мактабни тугатгач, хорижда меҳнат қилишга кетишни режалаштирмоқда.
Улардан хорижга нима мақсадда кетмоқчилиги сўралган. 37 фоизи ўқишга қизиқиши борлиги, аммо моддий имконияти йўқлигини билдирган. 33 фоизи эса бу саволга аниқ жавоб бера олмаслигини таъкидлаган. 9 фоизининг ўқишга қизиқиши йўқ, 21 фоизи эса ишлаб, пул топса, моддий аҳволи ўзгаришидан умидвор.
Респондентлардан кириш имтиҳонларига қай даражада тайёргарлик ҳақида ҳам савол берилган. Сўровнома иштирокчиларининг 44 фоизи кириш имтиҳонларига репетиторга бормасдан, мустақил тайёргарлик кўрган экан. 7 фоизининг эса ўқиш ният йўқ. 18 фоиз битирувчи ўқишга киришга мактабдаги билимлари етарли деб ҳисоблайди.
Статистик маълумотларга кўра, аҳолиси 35 миллиондан ортиқ бўлган Ўзбекистоннинг 1,6 миллионга яқин фуқароси республикадан ташқарида ишлайди. Меҳнат муҳожирларининг катта қисми Россия Федерациясида иш фаолиятини олиб боради.
Бундан ташқари, 2021 йилнинг иккинчи ярмида Ўзбекистондан 3354 нафар фуқаро Қозоғистонга, 1123 нафари Туркияга, 826 нафари Жанубий Кореяга, яна 1574 нафари бошқа мамлакатларга иш учун чиқиб кетишган.
Бугунги кунда умумий ўрта таълим мактаб битирувчилари сони 390 мингга яқинни ва 1-синф ўқувчилари эса 585 000 нафарни ташкил этади. Бу эса ўз навбатида 10 йилдан сўнг битирувчилар сони 1,5 баробарга ортишини билдиради.
Маълумот учун: 2020/2021-ўқув йилида умумтаълим мактабларининг 437,3 минг нафар 11-синф битирувчиларидан 109,3 минг (25 фоиз) нафари ОТМга кирган. ОТМ кирмаган битирувчилар сони 328,0 мингни (75 фоиз) ташкил этади.
Сўровномада қатнашганларнинг 57 фоизи ўз истагига кўра касб танламоқда. Респондентларнинг асосий қисми педагогика, психология каби соҳаларда фаолият юритишни мақсад қилган (драфтда).
Изоҳ (0)