ДХХ ходимлари томонидан Самарқанд, Фарғона, Андижон ва Наманган вилоятларида ўтказилган тезкор тадбирлар давомида гиёҳванд моддалар савдосига чек қўйилди. Бу ҳақда «Ўзбекистон 24» телеканали орқали эфирга узатилган лавҳада маълум қилинди.
ДХХ Самарқанд вилояти бўйича бошқармаси ходимлари томонидан вилоят ИИБ ходимлари билан ҳамкорликда ўтказилган тезкор тадбирда Самарқанд ва Навоий вилоятларини боғловчи «Самарқанд» мунтазам ЙПХ масканида Иштихон туманида яшовчи 40 ёшли шахс бошқарувидаги Nexia русумли автомашина тўхтатилиб, кўздан кечирилган.
Натижада унинг салон қисмида 2 килограмм 27 грамм опий моддаси борлиги аниқланиб, процессуал тартибда расмийлаштириб олинди. Аниқланишича, Тожикистондан контрабанда йўли билан олиб келинган ушбу наркотик моддаларни қонунбузар сотиш мақсадида Хоразм вилоятига олиб кетаётган бўлган.
Бошқа бир ҳолатда эса кўп босқичли тезкор тадбир ўтказилиб, дастлаб Самарқанд шаҳридаги «Чўпон ота» ЙПХ масканида тўхтатилган автомашинада йўловчи сифатида кетаётган, Бекобод шаҳрида яшовчи икки нафар фуқаронинг (1982 ва 1996 йилларда туғилган) ёнида 984 грамм «гашиш» моддаси борлиги аниқланиб, тегишли тартибда расмийлаштириб олинган.
Сўнгра Булунғур туманидаги «Юқори нуқта» ЙПХ масканида уларнинг шериги, Бекобод шаҳрида яшовчи, муқаддам 3 маротаба судланган шахс (1995 йилда туғилган) ўзининг Nexia русумли автомашинасида 989 грамм гашиш моддасини олиб кетаётган вақтида ушланган.
Шунингдек, ушбу гиёҳвандлик воситаларини Тожикистондан олиб келиб, сотилишини йўлга қўйган Бекобод шаҳрида яшовчи 27 ёшли гуруҳ ташкилотчиси ҳам Самарқанд вилоятида қўлга олинган.
Бу йўналишда ДХХ Фарғона ва Андижон вилоятлари бўйича бошқармалари ходимлари томонидан ҳам бошқа ҳуқуқни муҳофаза қилувчи идоралар билан ҳамкорликда тезкор тадбирлар ўтказилган. Жумладан, Қува туманида яшовчи 31 ёшли муқаддам судланган фуқаро келгусида сотиш мақсадида шериги, Андижон шаҳрида яшовчи шахсга 1 килограмм 986 грамм гашиш моддасини берган вақтида, уларнинг иккаласи ҳам қўлга олинган.
Аниқланишича, гиёҳвандлик моддасини Қирғизистон фуқаросидан 5 минг долларга сотиб олиниб, айланма йўллар орқали Қува туманига олиб келинган.
Шунингдек, Бешариқ туманида яшовчи 28 ёшли шахс тожикистонлик наркосавдогардан 5 минг доллар сотиб олинган 940 грамм опий моддасини контрабанда йўли билан Қўқон шаҳрига олиб келиб, муқаддам судланган икки нафар харидорга (1977 ва 1979 йилларда туғилган) сотаётган вақтида уларнинг барчаси қўлга олинган.
Қўқон шаҳрида кузатилган ҳолатда эса 35 ёшли муқаддам судланган шахс 826 дона «Регапен» ва 80 дона «Тропикамид» кучли таъсир қилувчи дори воситаларини 2 минг долларга сотаётган вақтида ушланган.
ДХХ Наманган вилояти бўйича бошқармаси ҳамда вилоят божхона бошқармаси ходимлари томонидан ўтказилган тезкор тадбирда Наманган—Тошкент йўналишида ҳаракатланаётган Nexia русумли автомашина Поп туманидаги «Наманган» мунтазам ЙПХ масканида тўхтатилган.
Автомашина холислар иштирокида кўздан кечирилганда, унда йўловчи сифатида кетаётган, Тошкент шаҳрида яшовчи 33 ёшли фуқаронинг ёнида 2237 дона «Регапен», 400 дона «Селофен» ва 300 дона «Тропикамид» кучли таъсир қилувчи дори воситалари борлиги аниқланиб, процессуал тартибда расмийлаштириб олинган.
Аниқланишича, қирғизистонлик фуқаро томонидан давлат чегарасидан айланма йўллар орқали Учқўрғон тумани ҳудудига ўтказиб берилган ушбу дори воситалари Тошкент шаҳрида сотилиши режалаштирилган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Самарқандда 2 кило опийни 30 минг долларга сотишга уринган Тожикистон фуқароси қўлга олингани, Сурхондарёда 20 кг опийни 140 минг долларга сотишга уринган шахс ушлангани, Ўзбекистонда Тожикистондан келтирган гиёҳванд моддаларни сотиш билан шуғулланган шахслар қўлга олингани тўғрисида хабар берилганди.
Изоҳ (0)