Surxondaryoda 20 kg opiyni 140 ming dollarga sotishga uringan shaxs ushlandi

IIV Jinoyat qidiruv bosh boshqarmasi, Davlat bojxona qo‘mitasi, Surxondaryo viloyati IIB Jinoyat qidiruv boshqarmasi Giyohvandlik moddalarini noqonuniy muomalasiga qarshi kurashish bo‘limi hamda viloyat Bojxona boshqarmasi xodimlari hamkorligida o‘tkazilgan tezkor tadbirda giyohvand moddalar savdosi bilan shug‘ullanuvchi shaxs qo‘lga olindi. Bu haqda Surxondaryo viloyati IIB axborot xizmati xabar berdi.

Ma’lum qilinishicha, Denov tumanida yashovchi Bobo ismli shaxs tuman hududida katta miqdorda giyohvandlik moddasining noqonuniy muomalasi bilan shug‘ullanayotgani haqida olingan ma’lumot asosida tezkor tadbir o‘tkazgan.

25-may kuni mazkur ma’lumot va “Qoradori-2022” keng qamrovli profilaktik tezkor tadbiriga mijoz sifatida kirgan ikki nafar vazirlik Jinoyat qidiruv bosh boshqarmasi xodimlari 140 ming dollar evaziga I.B. ismli shaxsdan 20 kilogramm opiy giyohvandlik moddasini sotib olish uchun Denov tumanidagi kafelarning birida uchrashgan.

Tezkor tadbirda I.B. 20 kilogramm opiy giyohvandlik moddasi borligi va uni pulni ko‘rgach, ishonch hosil qilib, olib kelib berishini ma’lum qilgan. U 26-may kuni soat 03:30 larda Denov tumani hududida moddalarini yashash uyidan olib, belgilangan joyga kelayotgan vaqtida tadbir ishtirokchilari tomonidan qo‘lga olingan. I.B.ning yonidan 20 ta skotch o‘ramga maxsus qadoqlangan modda hodisa joyida kechiktirib bo‘lmas harakatlar o‘tkazish vaqtida ochib ko‘rilgan va uning ichida qizg‘ish rangli, o‘tkir hidli opiy giyohvandlik moddasiga o‘xshash moddalar ekani aniqlangan.

Shundan so‘ng o‘ramlardagi giyohvandlik moddalari daliliy ashyo tariqasida xolislar ishtirokida protsessual tartibda rasmiylashtirib olingan.

Mazkur holat yuzasidan fuqaro I.B.ga nisbatan Jinoyat kodeksining 246-moddasi (kontrabanda), 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilgan.

Avvalroq O‘zbekistonda Tojikistondan keltirgan giyohvand moddalarni sotish bilan shug‘ullangan shaxslar qo‘lga olingani, Surxondaryoda xizmat iti vagon g‘ildiragiga yashirilgan 1,7 kilogramm giyohvand moddalarni aniqlagani, Samarqandda Tojikistondan ichiga giyohvand modda yashirib olib o‘tilgan propan gaz balloni portlagani to‘g‘risida xabar berilgandi.