Снарядлардан илма-тешик бўлган далалар ва «Тез ёрдам» кутаётган ярадорлар. Урушнинг 104-кунидан фоторепортаж
7 июнь куни ДХР Олий судида Украина томонида жанг қилган ва асирга олинган хорижликлар устидан суд жараёни бошланди. Россия мудофаа вазири Сергей Шойгу Северодонецкнинг турар жой мавзелари ва ЛХР ҳудудининг 97 фоизи «озод этилгани»ни эълон қилди. Россия давлат матбуоти томонидан Запорожьенинг «ҳарбий-фуқаролик маъмурияти раҳбари» сифатида таърифланадиган Евгений Балицкийнинг айтишича, вилоятдан дон ортилган биринчи поезд Қримга жўнаб кетган. Meduza урушнинг 104-кунига оид асосий фотосуратларни жамлади.
Киев вилояти
Бородянка посёлкасида яшовчи қизча вайрон бўлган турар жой бинолари ёнида арғимчоқда учмоқда. Март ойининг охирида Россия армияси Киев вилоятидан чекинган эди. Июнь ойи бошида вилоят ва пойтахт шаҳарлари яна ўққа тутилди.Фото: AFP
Харьков
Харьковлик қутқарувчилар Салтовка туманидаги зарарланган 16 қаватли турар жой биносининг қулаган конструкцияларини демонтаж қилмоқда. Шаҳар икки ойдан кўпроқ вақт давомида ўққа тутилди, май ойининг ўрталарида Украина армияси ниҳоят уни қайтариб олишга муваффақ бўлди. 7 июнь куни маҳаллий Telegram-каналлар Харьковда яна бир нечта портлашлар юз бергани ҳақида хабар берди.Фото: AFP
Кўнгиллилар Салтовка тумани аҳолисига озиқ-овқат тарқатмоқда. Ҳозир шаҳарда газ тўлиқ ва электр эса қисман йўқ.Фото: AFP
Луганск вилояти ғарбидаги Северодонецк шаҳри осмонига кўтарилган тутун ва чанг. 7 июнь куни Россия мудофаа вазири Сергей Шойгу Северодонецкнинг турар жой мавзелари тўлиқ «озод этилгани»ни маълум қилди. Украина расмийларининг айтишича, шаҳар учун кураш давом этмоқда.Фото: AFP
Украиналик аскар Донецк вилоятининг шарқий қисмидаги фронт чизиғида жойлашган Россия позицияларини нишонга олмоқда. Владимир Зеленскийнинг сўзларига кўра, ҳозирда Донецк вилояти шаҳарлари энг қайноқ нуқталарга айланган, шу боис Россия армияси Донбасс йўналишида қўшимча куч ишлатишга ҳаракат қилмоқда.Вилоят полициясининг маълум қилишича, 7 июнь куни руслар Донецк вилоятига 21 та ҳужум уюштирган, ярадорлар ва ҳалок бўлганлар орасида болалар ҳам бор. Россия Мудофаа вазирлиги вакили Игорь Конашенков россиялик ҳарбийлар Святогорск ва унинг атрофидаги ҳудудларни эгаллаётганини айтган.Фото: AFP
Донецк вилояти шимолидаги Баҳмут шаҳрида ҳарбий тез ёрдам машинасининг ёрдамидан фойдаланган ярадорлар сони. Урушни ўрганиш бўйича Америка институтининг хабар беришича, Россия кучлари шаҳар шимоли-шарқи билан Украинанинг алоқаларини узиб қўйиш бўйича муваффақиятсиз уринишларини давом эттирмоқда. Украина Қуролли кучлари маълумотларига кўра, Россия кучлари Баҳмутни «Точка-У» тактик ракета мажмуаси билан ўққа тутмоқда.Фото: AP Photo
Яраланган тинч аҳоли вакили ва икки ярадор аскар «Тез ёрдам» келишини кутмоқда.Фото: AP Photo
Славянскда ракета ҳужумидан вайрон бўлган турар жой биноси. Украина Қуролли кучлари бош штаби Россия кучлари шаҳарга ҳужум қилишга ҳозирлик кўраётгани ҳақида хабар берди. Кун давомида Славянск йўналишида жойлашган бир қанча аҳоли пунктларининг ҳудудлари ўққа тутилди. 6 июнь куни Россия Мудофаа вазирлиги Украина ҳарбий-ҳаво кучларининг МиГ-29 самолёти Славянск вилоятида ҳаво ҳужумидан мудофаа тизимлари томонидан уриб туширилганини хабар қилди.Фото: Reuters
Славянск яқинидаги далаларнинг сунъий йўлдошдан олинган тасвири. Унда ҳудуднинг юзлаб артиллерия снарядлари билан ўққа тутилганини кўриш мумкин.Фото: Reuters
Северодонецк томонга йўналтирилган баравар ўт очувчи реактив тизимлар турган даланинг сунъий йўлдошдан олинган тасвири. Қурилмалардан бирининг ортидаги ерда куйган излар бор, бу яқин орада ўт очилганини билдириши мумкин.Фото: Reuters
Лисичанск ва Северодонецк шимолидаги Рубижной шаҳрида вайрон бўлган турар жой биноларининг сунъий йўлдош тасвири. Украина Қуролли Кучлари маълумотларига кўра, Россия қўшинлари босиб олинган фронт чизиқларини ушлаб турган ҳолда, Украина кучларининг Рубижнойга ҳужуми йўналишида масофадан миналаш ишларини олиб бормоқда.Фото: AP Photo
Изоҳ (0)