Қозоғистон конституциясига 5 июнь кунги референдумда мамлакат фуқаролари томонидан қўллаб-қувватланган ўзгартириш ва қўшимчалар кучга кирди. Референдум натижалари тўғрисидаги расман эълон қилинди, деб ёзмоқда Tengrinews.
Конституцияга ўзгартириш ва қўшимчалар киритиш тўғрисидаги қонун 8 июнь куни «Қозоғистон ҳақиқати» газетасида эълон қилинди. Референдумда сайлаш ҳуқуқига эга 11 734 642 нафар фуқародан 7 985 769 нафари овоз берган. Сайловчиларнинг иштироки 68,05 фоизни ташкил этган.
Шундан сайловчиларнинг 77,18 фоизи (6 163 516 киши) конституцияга ўзгартиришлар киритишни ёқлаб овоз берган. Ўзгартиришларга қарши 18,66 фоиз (1 490 470 киши) овоз берилган. Сайлов бюллетенларининг 2,58 фоизи ҳақиқий эмас деб топилди. Овозларни санаб чиқишда бюллетенларнинг 1,58 фоизи ҳисобга олинмаган.
Қозоғистон конституциясига киритилган асосий ўзгаришлар:
- Қозоғистон супер-президентлик бошқарув шаклидан кучли парламентга эга президентлик бошқарувига ўтмоқда.
- ерусти ва ерости бойликлари, сув, ўсимлик ва ҳайвонот дунёси, бошқа табиий бойликлар халққа тегишлидир.
- Президентнинг яқин қариндошлари сиёсий давлат хизматчилари, квазидавлат сектори субъектлари раҳбарлари лавозимларини эгаллаш ҳуқуқига эга эмас.
- қозоғистонликлар мустақил равишда Конституциявий судга мурожаат қилиши мумкин.
- ўлим жазоси тақиқланган. Инсонни ўзбошимчалик билан яшашдан маҳрум қилишга ҳеч кимнинг ҳаққи йўқ.
- мажлиснинг депутатлик корпуси аралаш сайлов тизими бўйича тузилади.
- сенатдаги президентлик квотаси қисқартирилади, Қозоғистон халқ ассамблеясининг мажлисдаги квотаси бекор қилинади.
- Мажоритар тизим депутатни сайловчиларнинг илтимосига биноан чақириб олишга имкон беради.
- Биринчи президентнинг алоҳида ўрни ва имтиёзлари тўғрисидаги бандлар чиқариб ташланди.
Референдум ўтказилган деб топилиши учун унда иштирокчилар рўйхатига киритилган фуқароларнинг ярмидан кўпи иштирок этиши лозим бўлиб, 6 июнь, соат 14:00 ҳолатига кўра, сайловда иштирок этиш чегарасига эришилган.
Изоҳ (0)