НАТО бош котиби ёрдамчиси Камил Гранднинг маълум қилишича, альянснинг ҳар бир аъзоси ўз ҳудудига ядро қуроли жойлаштириш масаласини ўзи ҳал қилади.
Финляндия бош вазири Санна Марин бу масала кун тартибида эмаслигини айтганди.
НАТО бош котибининг мудофаа сармоялари бўйича ёрдамчиси Камил Гранд RTС телеканалига берган интервьюсида, агар Финляндия ва Швеция альянсга қўшилса, бу давлатлар ҳудудига ядро қуроли жойлаштирилмаслигига кафолат бера олмаслигини айтди.
«Шу нуқтаи назардан, мен бу минтақадаги ҳарбий стратегиямиз бўйича Россияга қандайдир кафолатлар беришга ишончим комил эмас» — деган у. Гранднинг қўшимча қилишича, бу масала ҳозирча муҳокама қилинмаган.
Бош котиб ёрдамчиси, шунингдек, иттифоққа аъзо ҳар бир давлат ўз ҳудудига ядро қуролини жойлаштириш ёки жойлаштирмасликни ўзи ҳал қилишини таъкидлаган.
Гранднинг сўзларига кўра, Шимолий Атлантика альянси Швеция ва Финляндиянинг иттифоққа киришини тезлаштириш учун барча имкониятларни ишга солмоқда. Бу икки давлат 18 май куни НАТОга аъзо бўлиш учун ариза берган ва бу қарорни Россиянинг Украинадаги ҳарбий амалиёти бошланганидан кейин хавфсизлик соҳасидаги ўзгаришлар билан изоҳлаган. Шу билан бирга, расмий Стокгольм ва Хелсинки ушбу ҳаракат Москвага қарши қаратилмаганини таъкидлаган.
Швеция ва Финляндия НАТОга қўшилиши учун уларнинг аризалари иттифоқнинг барча 30 аъзоси томонидан кўриб чиқилиши ва маъқулланиши керак. Бироқ альянс аъзоларидан Туркия уларнинг иттифоққа қўшилишига рози эмас. Туркия томони ушбу давлатлардан Курдистон ишчи партияси аъзоларини Анқарага экстрадиция қилиш, Туркия террорчи деб ҳисоблаган тузилмалар билан боғлиқ барча ташкилотларни ёпиш ва турк томонига тегишли кафолатлар беришни талаб қилди. Туркия президенти Ражаб Тоййиб Эрдўғон Финляндия ва Швецияни «инсофсиз ва носамимий» дея атади ва у президент экан, Анқара уларнинг иттифоққа киришини маъқулламаслигига ваъда берди.
Стокгольм ва Хельсинкининг иттифоққа қўшилишини қўллаб-қувватловчи бош котиб Йенс Столтенберг аъзоларни Анқаранинг хавотирларини ҳисобга олишга чақирди. Камил Гранд эса 28—30 июнь кунлари Мадридда бўлиб ўтадиган НАТОнинг навбатдаги саммитида келишмовчиликлар ҳал этилишига умид билдирди.
Ҳозирда Шимолий Атлантика альянсининг учта аъзоси ядро қуролига эга. Булар АҚШ, Франция ва Буюк Британия.
Изоҳ (0)