Прогнозлаштириш ва макроиқтисодий тадқиқотлар институти ёнилғида ҳаракатланувчи автотранспорт воситаларини ҳавога чиқараётган корбонат ангидрид газини ҳисоблаб чиқди. Натижалар электромобиллар билан солиштирилди.
Электромобильлардан фойдаланиш жараёнида ажралиб чиқувчи CO2 (углерод диоксиди, карбон диоксиди, карбонат ангидриди) миқдори нолга тенг бўлгани билан, электр энергиясини ишлаб чиқаришда ҳосил бўлувчи углерод диоксидини унутмаслик керак.
Электр энергияси кўмирдан олинганда атмосферага жуда кўп миқдорда CO2 ажралади.
Шундай экан, «яшил» деб аталувчи электромобиллар зарарли газларни камайтириш ўрнига аксинча, кўпайтириб юбормайдими?
2020 йилда бундай автотранспорт воситалари чиқарган зарарли газлар эмиссияси 7,69 млн тоннага тенг бўлгани ҳисоблаб чиқилди.
Шунингдек, мазкур транспорт воситалари электр энергияси воситасида ҳаракатланган тақдирда, эмиссия ҳажми 35,11 фоизга кам бўлиши аниқланди.
Дунё миқёсида CO2 эмиссиясининг қарийб 22,7 фоизи транспорт секторининг улушига тўғри келади. Ўзбекистонда бу кўрсаткич 13,3 фоизга тенг.
Шу сабабли дунёдаги автомобилсозлик компаниялари ички ёнув двигателига эга автомобилларни ишлаб чиқаришни буткул тўхтатиб, тўлиқ электромобилларни ишлаб чиқаришга ўтишини маълум қилмоқда.
Жумладан, Volvo ва Mercedes-Benz автоконцернлари 2030 йилдан, General Motors 2035 йилдан, Ауди 2033 йилдан электромобиллар ишлаб чиқаришга тўлиқ ўтишни режалаштирмоқда.
Ўзбекистонда ҳам сўнгги йилларда автомобиль транспортининг иқлим ўзгаришидаги улушини камайтиришга қаратилган ишлар кўпайди.
2018 йилда Париж битимини (Париж, 2015 йил 12 декабрь) ратификация қилиш тўғрисидаги қонуннинг қабул қилиниши ва «2019-2030 йиллар даврида Ўзбекистон Республикасининг «яшил» иқтисодиётга ўтиш стратегияси» тасдиқланиши бу йўлдаги катта қадамлардир.
2019 йилдан бошлаб Ўзбекистонга импорт қилинаётган электромобиллар учун нол миқдордаги божхона тўлови белгиланди ва йил ўрталарига келиб электромобиллар учун амалда бўлган акциз солиғи ҳам бекор қилинди.
2021 йилда солиқ кодексига тегишли ўзгартиришлар киритилди ва электромобиллар автотранспорт йиғимидан озод қилинди.
Ўзбекистонда электромобилларни ишлаб чиқаришни йўлга қўйиш мақсадида Фарғона вилоятида Хитойнинг Hong Kong ZRSC Technology корхонаси билан, Бухоро вилоятида Жанубий Кореянинг Songuo Mobility Innovation корхонаси билан ҳамкорликдаги лойиҳаларни амалга оширишга киришилди.
Автомобильларнинг CO2 эмиссияси ҳажмини аниқлаш мураккаб ҳисоб-китобларни талаб қилади. Двигатель электр энергиясида ҳаракатга келадими ёки ёнилғида, энергия/ёнилғи сарфи моделларнинг русумига қараб турлича бўлади.
Ҳатто, бир моделдаги автомобилларда ҳам «шаҳар» ёки «трасса» тартибида, ундаги юкнинг оғирлиги ва ҳайдаш услубига қараб электр/ёнилғи сарфи фарқ қилади.
Бу эса ўз навбатида, ҳосил бўладиган углерод диоксиди миқдори турлича бўлишига олиб келади.
Таҳлилда хорижий олимлар ўз тадқиқотларида фойдаланган ўртача бирликлар мамлакатимизда оммалашган бир қанча автомоделлар мисолида қўлланилган.
Жумладан, 100 км масофа учун ўртача 9 литр бензин, 34,4 литр дизель ёнилғиси сарфланади, деб ҳисобланади.
Худди шунча масофани босиб ўтиш учун электр двигателли автомобиллар сарфлайдиган ўртача электр сарфи: енгил автомобиллар учун 18,64 кВт/с, оғир турдагилари учун эса 144 кВт/с деб белгиланган.
Қуйида ёнилғи ва электр энергиясида ҳаракатланувчи автотранспорт воситалариниг 100 км масофани бошиб ўтиши учун қанча углерод диоксиди чиқарилиши акс эттирилган.
Кўриниб турибдики, 100 км масофани босиб ўтиш учун бензин воситасида ҳаракатланувчи енгил автомобиллар ўртача 21,15 кг, электромобиллар эса 9,91 кг CO2 ажратиб чиқаради.
Юк автомашиналари борасида тўхталганда шуни айтиш жоизки, агар улар дизель ёнилғисида ҳаракатланса 91,16 кг, электр энергиясида ҳаракатланса 76,6 кг углерод диоксиди ҳосил бўлади.
Аммо, бу услубдаги ҳисоб-китобда 100 км масофа ўзгармас, деб белгилаб олингани сабабли ажраладиган CO2 нинг автомобиль русумлари кесимидаги улуши бузилади.
Мазкур ҳолатни ҳал этиш учун таҳлил метадологиясига «умумий босиб ўтилган масофа» омили қўшилган.
Бунда Давлат статистика қўмитасининг Ўзбекистонда 2020 йил давомида автотранспорт воситалари сарфлаган бензин ва дизель ёнилғисининг умумий миқдорига оид маълумотлар асос қилиб олинган.
Ҳисоблашнинг биринчи босқичида сарфланган умумий ёнилғи миқдори ички ёнув двигателли автомобилнинг ўртача истеъмол кўрсаткичига бўлинади ва умумий босиб ўтилган масофа аниқланади.
Иккинчи босқичда эса, ушбу масофани тегишли CO2 эмиссияси омилига кўпайтириш орқали автотранспорт воситалари ажратиб чиқарадиган зарарли газлар миқдори ҳисоблаб чиқилади.
Тадқиқот давомида мазкур усулдан фойдаланилган ҳолда ёнилғи воситасида ҳаракатланувчи автотранспорт воситаларининг умумий CO2 эмиссияси 7,69 млн тонна эканлиги ҳисоблаб чиқилди.
Электромобильларда эса худди шунча масофани босиб ўтишда 4,99 млн тонна CO2 ажралиб чиқиши аниқланди. Бундан кўриниб турибдики, электромобиллардан фойдаланиш орқали атмосферага чиқарилаётган CO2 эмиссиясини 2,7 млн тоннага камайтириш мумкин.
Бироқ агар Ўзбекистондаги барча дизель ва бензинда ҳаракатланадиган автомобиллар электр энергиясига ўтадиган бўлса унда қўшимча 9,3 млрд кВт/с электр қувватига эҳтиёж юзага келади.
2020 йил якунларига кўра,Ўзбекеистонда ишлаб чиқарилган лекетр энергиясининг умумий ҳажми 66,5 млрд кВт/соатни, истеъмол ҳажми эса 69 млрд кВт/соатни ташкил қилади. Бу эса қўшимча ишлаб чиқариш қувватларига эҳтиёж борлигини англатади.
Изоҳ (0)