Бухоро давлат университетига фуқарони ишга жойлаштириш эвазига пора олган ходим ушланди. Бу ҳақда «Дарё»га вилоят Миллий гвардия бошқармаси ахборот хизмати раҳбари Муроджон Раҳматуллаев маълум қилди.
Таъкидланишича, шофирконлик фуқаро Н.Б. бундан бир неча ой илгари Бухоро давлат университети ишчиси Г.Ғ. уни тюторлик вазифасига ишга киритиб қўйиши эвазига 500 доллар талаб қилган. У мазкур сумманинг 400 долларини ишга киргунча ва қолган 100 долларини ишга жойлаштиргандан сўнг беришини сўраган.
Н.Б. ҳуқуқ-тартибот идораларига ҳозирга қадар ишга жойлаштириш масаласида фуқаро Г.Ғ. ундан 400 доллар олган бўлишига қарамай, уни алдаб келаётгани ва берган пулини қайтариб бермаётгани юзасидан ариза билан мурожаат қилган.
Ариза юзасидан Миллий гвардия вилоят бўйича бошқармаси ва Иқтисодий жиноятларга қарши курашиш департаментининг вилоят бошқармаси ходимлари билан ҳамкорликда тезкор тадбир ўтказилган. Ўтказилган тадбир давомида Г.Ғ. Бухоро давлат университетида фаолият юрита туриб, ўз хизмат мавқейидан фойдаланган ҳолда Н.Б.дан ҳақиқатан ҳам пора олгани очиқланган. Н.Б. университет ишчиси Г.Ғ.га қўнғироқ қилиб, ишга кириши эвазига бундан бир неча ой илгари берган 400 долларни қайтариб беришини сўраган. Шунда у Н.Б.дан олган пулини такси ҳайдовчиси Л.М. орқали етказишини маълум қилган.
Айни пайтда ҳолат юзасидан департаментнинг вилоят бошқармаси ходимлари томонидан тегишли процессуал ҳужжатлар расмийлаштирилиб, суриштирув ишлари олиб борилмоқда.
Аввалроқ Қашқадарёда фуқарони ишга киритиб қўйиш эвазига 900 доллар пора олган йўл қурилиш участкаси бошлиғи ушлангани, Қорақалпоғистонда фуқародан ишга киритиб қўйиш эвазига 3 минг доллар сўраган Бандликка кўмаклашиш маркази ходими қўлга олингани, Тошкент вилоятида тиббиёт ходимини бош шифокор ўринбосари этиб тайинлашга ёрдам бериш учун 1,3 минг доллар олган шахслар ушлангани тўғрисида хабар берилганди.
Изоҳ (0)