Наманган вилоятининг Янгиқўрғон тумани, Поромон қишлоғида жойлашган цемент заводида юз берган фавқулодда ҳолат ҳақида олдинроқ хабар берилганди. «Дарё» мухбири Азизбек Абдувалиев завод мутасаддилари билан боғланиб, воқеа тафсилотларини ўрганди.
Маълум бўлишича, ҳодиса 3 июнь куни соат 7:00 атрофида «Жаҳон евро сервис» масъулияти чекланган жамиятига қарашли цемент заводига қарашли омборда рўй берган.
400 тонна сиғимга эга омборга яримтайёр маҳсулот белгиланган меъёрдан кўп миқдорда олингани сабабли омборнинг том қисми қулаб тушган.
«Омборнинг том қисми ғишт билан уриб чиқилганди. Киритилган маҳсулот кўпайиб, том босим ортишига бардош беролмаган. Натижада хом ашё юқорига отилиб, видеода барча кўрган чанг-тўзон ҳосил бўлган. Юз берган ҳолатдан ўзимизга тегишли хулоса чиқардик. Омбор томини бетон билан мустаҳкамлаб, техника хавфсизлиги ва меҳнат муҳофазаси чораларини кучайтирамиз», — дейди корхона бош механиги Анваржон Ҳакимов.
Қайд этилишича, ушбу завод қурилиши 2017 йилда бошланган. Тўлиқ қувват билан ишга тушгач, бир суткада 1000 тонна цемент ишлаб чиқарилади. Ҳозирда 100 киши фаолият юритмоқда, жараёнлар якунлангач, яна 60 киши ишга олинади.
«Ҳали тўлақонли маҳсулот ишлаб чиқаришга киришганимиз йўқ. Ҳозир синов ва тайёргарлик жараёни кетяпти. Яқин орада тўла қувват билан ишлашга ўтамиз. Шу маънода юз берган ҳолат биз учун катта сабоқ бўлди», — дейди Анваржон Ҳакимов.
Янгиқўрғон туман фавқулодда вазиятлар бўлими бошлиғи, подполковник Анваржон Абдуллаевнинг қайд этишича, ҳодиса туфайли корхона ишчи-ходимлари орасида жабрланганлар йўқ. Шунингдек, бошқа бино-иншоотларга ҳам зарар етмаган.
Туман ФВБ ходимлари томонидан корхона ишчи-ходимлари ўртасида техника хавфсизлиги ва меҳнат муҳофазаси қоидалари бўйича тушунтириш ишлари олиб борилган.
Изоҳ (0)