“Келаси ой учун 20 млн сўм бериб тур дейди”. Шерзод Кудбиев ўз ходимлари олдиндан солиқ ундираётганини қоралади

Ўзбекистонда тадбиркорлардан келаси ой ёки чорак учун олдиндан солиқ ундириш амалиёти мавжуд. Бу ҳақда жорий йил 27 июнь куни Тошкент шаҳрида ўтказилган тадбиркорлар билан мулоқотда Солиқ қўмитаси раиси Шерзод Кудбиев маълум қилди.

Шерзод Кудбиев республикада солиқ тушумлари ошаётгани, шунга қарамай баъзи солиқчилар олдиндан пул ундиришга уринаётганини қоралади.

“Солиқ тушумларида шу йилнинг олти ойида ўтган йил мос даврига нисбатан камида 25 фоиз ўсиш бўлади. Ҳалигача айрим солиқ органларида тадбиркорга қўнғироқ қилиб, ‘5, 10, 20 миллион сўм ўтказиб тур, кейинги ой ҳисобидан ҳозир аванс бериб тур’, деган масалалар турибди. Ўзимнинг ходимларимга: ъҳой барака топгурлар, солиқ тушуми ўзи 25 фоиз ўсяпти, майли бу 24 фоиз бўлақолсин. Бизни 30–40 фоиз қиласан деган топшириғимиз йўқ-куъ, дейман”, деди қўмита раис.

Шерзод Кудбиев сўзи давомида ҳали топилмаган даромад учун олдиндан солиқ тўлаш тадбиркорни хафа қилишини айтди.

“Кичик бизнесдан 10 миллиард сўм пул тушириш учун 10 миллион сўмдан мингта тадбиркордан олиш керак. ‘Бу ерда мингта тадбиркорни қанчалик хафа қилиб ташлаймиз? Пулини олдиндан олиб қўйган бўламиз. Шу ишнинг нима кераги бор’, дейман. Албатта, камчилик ва хатоларимиз бор. Секин-аста тўғрилаб борамиз. Шу каби аччиқ масалалар бўлса ҳам айтсанглар, тўғрилашга ҳаракат қиламиз. Шунда дардларингизни тушунишни бошлаймиз, очиқчасига гаплашишга чақириб қоламиз”, дея тадбиркорларга мурожаат қилди ташкилот расмийси.

“Дарё” аввалроқ олдиндан солиқ ундириш амалиётининг хатарлари тўғрисида мақола эълон қилганди. Таҳлилда тадбиркор солиқчилар босимидан қўрқиб, айланма маблағидан ортиқча солиқ тўлашга мажбур бўлиши ёзилган. Бундай норасмий ва ноқонуний хатти-ҳаракат ортидан иқтисодий вазиятни реал баҳолаш имконсиз ҳолга келиши қайд этилган. Шунингдек, бизнес, ишлаб чиқариш ва рақобат дарз кетиши мумкинлиги таъкидланган. Энг ёмони, айланма маблағларидан ҳали олмаган фойдаси учун солиқ тўлаган тадбиркорда қийин молиявий аҳволга тушиб қолиш эҳтимоли борлиги таҳлил қилинган.  

Солиқ кодексида ёзилишича: “ортиқча ундирилган солиқ суммаси — солиқ органларининг ғайриқонуний хатти-ҳаракатлари натижасида ортиқча тўланган солиқ суммаси” ҳисобланади.