Namangan viloyatining Yangiqo‘rg‘on tumani, Poromon qishlog‘ida joylashgan sement zavodida yuz bergan favqulodda holat haqida oldinroq xabar berilgandi. “Daryo” muxbiri Azizbek Abduvaliyev zavod mutasaddilari bilan bog‘lanib, voqea tafsilotlarini o‘rgandi.
Ma’lum bo‘lishicha, hodisa 3-iyun kuni soat 7:00 atrofida “Jahon yevro servis” mas’uliyati cheklangan jamiyatiga qarashli sement zavodiga qarashli omborda ro‘y bergan.
400 tonna sig‘imga ega omborga yarimtayyor mahsulot belgilangan me’yordan ko‘p miqdorda olingani sababli omborning tom qismi qulab tushgan.
“Omborning tom qismi g‘isht bilan urib chiqilgandi. Kiritilgan mahsulot ko‘payib, tom bosim ortishiga bardosh berolmagan. Natijada xomashyo yuqoriga otilib, videoda barcha ko‘rgan chang-to‘zon hosil bo‘lgan. Yuz bergan holatdan o‘zimizga tegishli xulosa chiqardik. Ombor tomini beton bilan mustahkamlab, texnika xavfsizligi va mehnat muhofazasi choralarini kuchaytiramiz”, — deydi korxona bosh mexanigi Anvarjon Hakimov.
Qayd etilishicha, ushbu zavod qurilishi 2017-yilda boshlangan. To‘liq quvvat bilan ishga tushgach, bir sutkada 1000 tonna sement ishlab chiqariladi. Hozirda 100 kishi faoliyat yuritmoqda, jarayonlar yakunlangach, yana 60 kishi ishga olinadi.
“Hali to‘laqonli mahsulot ishlab chiqarishga kirishganimiz yo‘q. Hozir sinov va tayyorgarlik jarayoni ketyapti. Yaqin orada to‘la quvvat bilan ishlashga o‘tamiz. Shu ma’noda yuz bergan holat biz uchun katta saboq bo‘ldi”, — deydi Anvarjon Hakimov.
Yangiqo‘rg‘on tuman favqulodda vaziyatlar bo‘limi boshlig‘i, podpolkovnik Anvarjon Abdullayevning qayd etishicha, hodisa tufayli korxona ishchi-xodimlari orasida jabrlanganlar yo‘q. Shuningdek, boshqa bino-inshootlarga ham zarar yetmagan.
Tuman FVB xodimlari tomonidan korxona ishchi-xodimlari o‘rtasida texnika xavfsizligi va mehnat muhofazasi qoidalari bo‘yicha tushuntirish ishlari olib borilgan.
Izoh (0)