WP: Хитой раиси санкцияларни бузмаган ҳолда Россияга ёрдам беришни буюрди

Хитой Халқ Республикаси раиси Си Цзиньпин ўзининг энг яқин маслаҳатчиларига Ғарб санкциялари бузмаган ҳолда Россияга молиявий кўмак бериш йўлини ўйлаб топишни буюрди, деб ёзади «РБК». Бу ҳақда The Washington Post газетаси Хитой ва Америка мансабдорларига таяниб хабар берган.

Нашр суҳбатдошларига кўра, Пекин қийин вазиятга тушиб қолган, чунки, бир томондан, «ўзининг энг муҳим стратегик шериги»га ёрдам беришга интилмоқда, иккинчи томондан эса АҚШ ва унинг иттифоқдошлари Хитойни технологиялардан узиб қўйиб, мамлакат молиявий тизимига зарба беришидан хавфсирамоқда.

Бу орада Москва Пекин томонидан кўмак кучайишига умид қилмоқда, деди мансабдорлар. Улар тафсилотларни келтирмади. Бироқ улардан бирининг сўзларига кўра, Россия томони Хитой томонидан Украинадаги ҳарбий операциядан аввалроқ пайдо бўлган «савдо мажбуриятлари» бажарилишига, шунингдек, «молиявий ва технологик кўмак»ка умид қилмоқда. Аммо Россия қурол-яроғ сўрамаган.

«Биз (Москванинг) қийин вазиятини тушунамиз. Бироқ биз ўзимиз тушган вазиятни ҳам эътиборсиз қолдира олмаймиз. Хитой доим ўз халқи манфаатлари йўлида иш тутади», — деди муҳокамалар билан бевосита таниш бўлган амалдор.

Хитойнинг АҚШдаги элчихонаси матбуот котиби Лю Пенюй таъкидлашича, муаммо Россияга санкцияларни айланиб ўтишда ёрдам бериш эмас, балки «Россия ва Хитой ўртасидаги нормал иқтисодий ва савдо ҳамкорлигига асоссиз зарар берилганидир». Чекловлар барча томонлар учун «ютқизиқли» вазиятдир, дея қўшиб қўйди у.

WP суҳбатдошларидан бири АҚШнинг Россияга санкцияларни айланиб ўтишда ёрдам бериши оқибатлари ҳақидаги огоҳлантиришлари борасида гапирар экан, уларнинг асл сабаби Пекин ва Москва ўртасига низо солишдан иборат деди, бу эса, унинг фикрича, амалга ошмайди. «Хитой-Россия алоқаларини бузиш уларнинг қўлидан келмайди», — дея ишонч билдирди у.

Айни вақтда, нашр суҳбатдошига кўра, Украинадаги ҳарбий ҳаракатлар Хитой кутганидан кўра узоқроқ давом этиб кетган ва Пекин Москвага жанговар ҳаракатларни тўхтатиш «санкцияларга қарши кураш ва ишбилармонлик алоқаларини ривожлантириш учун кўпроқ эркинлик» беришини тушунтирган.

Аввалроқ Зеленский Пекин Россиянинг Киевга қарши агрессиясига Ғарбнинг тараққий этган давлатлари каби жавоб бермаганини айтганди. «Хитой ҳозир бошқа давлат ҳудудини босиб олиш одатий ҳол деган позицияни эгаллаб турибди», — деди Зеленский. У Пекиннинг Россия билан «бирлашиши»дан огоҳлантирди ҳамда Япония икки давлат ўртасидаги бундай «ҳамкорлик» хавфини яхши тушунишини таъкидлади.

24 май куни Россия ва Хитой стратегик бомбардимончи самолётлари Россиянинг Украинага босқини бошланганидан кейинги биринчи қўшма парвозини амалга оширди. Ядро қуролини олиб юришга қодир самолётлар ҳавога кўтарилиб, Япония ва Шарқий Хитой денгизлари устидан учган. Бу Австралия, Япония ва Ҳиндистон раҳбарлари билан учрашган АҚШ президенти Жо Байденнинг минтақага ташрифи фонида юз берди. Мазкур давлатлар хавфсизлик бўйича тўрт томонлама мулоқот иштирокчилари ҳисобланади.