Туркияда истеъмол нархлари индекси май ойида ўтган йилнинг мос даврига нисбатан 73,5 фоизга ошди. Бу ҳақда Туркия Статистика институти баёнот берди.
Нархлар 2022 йилнинг апрелига нисбатан 2,98 фоизга, 2021 йилнинг декабрига нисбатан 35,64 фоизга ошди.
Май ойида энг кўп транспорт хизматлари (107,62 фоизга), шунингдек, озиқ-овқат ва алкоголсиз ичимликлар (91,63 фоиз), мебель ва уй-рўзғор буюмлари (82,08 фоиз) ўсди.
Энг кам нархларнинг ўсиши телекоммуникация (19,81 фоиз), таълим (27,48 фоиз), кийим-кечак ва пойабзал (29,8 фоиз)да кузатилди.
Туркияда йиллик инфляция 23 йил ичида максимал даражага кўтарилди
Аввалги энг юқори кўрсаткич 1998 йил октябрь ойида бўлган, ўшанда Туркия иқтисодий инқироз ва беқарор коалиция ҳукумати ўзгариши билан юзма-юз келган эди.Жорий инфляция иқтисодиёт ва ишлаб чиқаришни рағбатлантириш мақсадида асосий ставкани оширишга қарши чиққан Туркия президенти Ражаб Тоййиб Эрдўғоннинг иқтисодий сиёсати билан боғланмоқда.
Эрдўғон учун вазият Украинадаги уруш туфайли мураккаблашди, бунинг натижасида энергиянинг жаҳон нархлари кўтарилиб, Туркиянинг ушбу тоифадаги катта харажатларини оширди.
Турмуш нархининг ошиши 2023 йил июнига режалаштирилган сайловлар олдидан Эрдўғонни жамоатчилик томонидан қўллаб-қувватлашнинг сусайишига олиб келди.
Бироқ Эрдўғоннинг ҳозирда кучли рақиблари йўқ: олтита мухолифат партиясидан иборат коалиция ягона номзод бўйича келиша олмаяпти, кўплаб мухолифатчи сиёсатчилар аллақачон судланган ёки жазога тортилган.
Bloomberg экспертларининг фикрича, инфляция сайловолди кампаниясида амалдаги президентнинг асосий рақибига айланиши мумкин.
Аввалроқ БМТ Туркиянинг халқаро номини ўзгартиргани, энди у «Türkiye» деб аталиши ҳақида хабар берилганди.
Изоҳ (0)