Даҳшатли терактда омон қолган 101-рейс воқеаси экранга кўчди: Ҳошим Арслонов иштирокидаги сўнгги фильм премьерасидан репортаж (фото)

Тошкент шаҳридаги Киночилар уйида 1 июнь куни режиссёр Акром Шоҳназаровнинг «101-рейс» фильми катта премьераси бўлиб ўтди. Бу ҳақда «Дарё» мухбири хабар бермоқда.

Кинематография агентлиги ва «Ёшлик» киностудияси томонидан суратга олинган бадиий фильми реал воқеага асосланган бўлиб, унда 2001 йил АҚШнинг Нью-Йорк шаҳрида содир этилган террорчилик ҳаракати оқибатида Шимолий Америка ҳаво ҳудудида қийин вазиятда қолган – бортида 180 нафар йўловчи бўлган «Ўзбекистон ҳаво йўллари» авиакомпаниясига қарашли Боинг-757 самолётининг 101-рейс экипажи кўрсатган жасорат ҳақида ҳикоя қилинади. Бу парвоз тажрибали учувчи Зариф Саидазимовнинг охирги, якунловчи парвози бўлади.

Тақдимот аввалида фильмда бош ролни ижро этган Ўзбекистонда хизмат кўрсатган артист Ҳошим Арслонов хотирасига бағишланган видеоролик намойиш этилди. Премьерада фильм бош қаҳрамони прототипи Ўзбекистон Қаҳрамони Зарифхўжа Саидазимов қатнашиб, киноижодкорларга ўз миннатдорлигини билдирди ва марҳум актёр Ҳошим Арслонов ижросини эътироф этди.

Сценарий муаллифи ва режиссёр Акром Шоҳназаров «Дарё» мухбирига берган интервьюсида фильм нега тўрт йилдан кейин премьера қилинаётганини қуйидагича изоҳлади.

«Замон қаҳрамонини экранга олиб чиқиш мақсадида 2017 йили сценарий ёзишга киришдим. Фильмнинг 90 фоизи реал воқеаларга асосланган. Биз фақат 10 фоизини бадиийлаштирдик. Бу борада ёзувчи ва киноссенарист Эркин Аъзам яқиндан ёрдам берди. Фильмда гавдалантирилган воқеаларнинг эса ҳаммаси ҳақиқат.

Суратга олиш ишлари 2018 йилда бошланган. Ярим йил давомида ўрганиш ва тайёргарлик ишлари олиб борилди. Бош ролга актёр танлаш ҳам кўп вақт олди ва охири раҳматли устоз санъаткор Ҳошим Арслонов номзодида тўхталдик.

«Съёмка» ишлари 2001 йил 11 сентябрь куни Америка сари йўл олган самолётнинг ўзида бўлиб ўтди. Бу самолёт ҳозир ҳам парвоз қилади. Шу боис у бизга ҳар олти ойда ўн кунга бериб турилди. Яъни парвоз қилаётган самолётнинг турли қисмлари «ремонт» бўлаётган вақтида биз ҳам тасвирга тушириш ишларини олиб борганмиз. Ремонт ўн кун бўлса, суратга олиш ҳам шунча вақт бўлди. Шунинг учун жараён анча чўзилди. Бунга пандемия ҳам сабаб бўлди. Бундан ташқари, фильмнинг 70 фоизида графикадан фойдаланилгани туфайли бир неча ой вақтимиз графика ва мусиқий ишларга кетди», — дейди Акром Шоҳназаров.

Суратга олиш ишлари Ўзбекистонда бўлиб ўтган. Фильмда Ўзбекистонда хизмат кўрсатган артист Ҳошим Арслонов, Лола Элтоева, Самиддин Лутфуллаев, Умид Искандаров, Олег Галахов, Эркин Бозоров, Хуршид Тўхтаев, Нигина Анорбоева, Баҳора Арслонова каби актёрлар рол ижро этган.

Ўзбекистонда хизмат кўрсатган артист Лола Элтоеванинг қайд этишича, тасвирга олиш ишлари осон кечмаган.

«Сценарийни ўқиб чиққанимда менга жуда маъқул келди. Чунки фильмда инсонлар тақдири ҳақида ҳикоя қилинади. Суратга олиш жараёнидан олдин катта тайёргарлик кўрдик. Бу касб эгалари йўловчиларга ички туғёнлари, дардларини сездирмай, касбига фидойилик билан меҳнат қилишини тушундим. Улар худди актёрларга ўхшар экан. Негаки биз ҳам саҳнага чиққанимизда шахсий муаммоларимизни парда ортида қолдирамиз.

Бу кинода стюардесса қизлар раҳбари, яъни борт бошқарувчиси ролини ижро этдим. Буни талқин қилиш осон кечгани йўқ, албатта. Шу пайтга қадар авиация соҳаси ходими ролини ўйнамагандим. Мазкур бадиий фильм ҳам, ролим ҳам фаолиятимда алоҳида аҳамиятга эга бўлиб қолиши, шубҳасиз», — дейди актриса.

Актёр Умид Искандаровнинг айтишича, фильмда эркаклик ғурури, орият жуда баланд тарзда акс этган.

«Съёмка жараёнлари нега кўп вақт давом этгани ҳақида кўп сўрашмоқда. Шу пайтга қадар самолётда суратга олиш тажрибаси ўзбек режиссёрларида ҳам, операторларида ҳам, актёрларда йўқ эди. Тасвирга олиш вақтида самолётни ҳам, печкаларини ҳам ёқиб қўйсак, тонна-тонна бензин сарфланарди. Исрофгарчиликка йўл қўймаслик учун ҳам қийинчиликларни енгиб ўтишга ҳаракат қилдик.

Самолётдаги учувчилар хонаси тор ва кичкина бўларкан. У ердаги ўриндиққа кириб ўтиришга ҳам, жойингиздан туришингизга ҳам кўп вақт кетади. Ёзда иссиқ, қишда совуқ бўлганлиги боис камера қаршисида ишлаш қийин кечди. Айниқса, ёз ойларида терлаб, кийимларимиз жиққа ҳўл бўларди. Шунинг учун бизга иккита форма тикиб беришди, алмаштириб жараённи давом эттирдик.

Премьера куни узоқ кутилган сана бўлди ва мен буни интиқлик билан кутгандим. Менинг фильмографиямда, «101-рейс»нинг алоҳида ўрни бор. Съёмка жараёнлари узоқ давом этди ва ижодий ишларимнинг энг қизиқарлиси бўлди», — дейди Умид Искандаров.