Тошкент вилоятида МФЙ раислигига номзод иш тажрибаси кўплиги рўкач қилиниб, номзодлар сафидан чиқариб ташланди

Тошкент вилоятининг Бўстонлиқ тумани «Бунёдкор» маҳалла фуқаролар йиғинида яшовчи фуқаролар 2022 йилнинг 19 май куни МФЙ раислиги учун бўлиб ўтган сайлов адолатсиз ўтганини, у аввалдан тайёрлаб қўйилган томоша бўлганини айтмоқда. Шу маҳаллада яшовчи Ли Айгул эса сайлов куни номзоди олиб ташланганини ва бунга иш тажрибасининг кўплиги сабаб қилиб кўрсатилганини айтмоқда.

«Президентимизнинг жамиятда аёлларга бўлган эътиборни кучайтириш ва гендер тенгликни таъминлаш борасидаги фикрларидан келиб чиқиб, МФЙ раислигига номзодимни қўйдим. Ўзим ишлаган ва яшаётган маҳалламни гуллатаман, ривожлантираман дегандим. Аммо адолатсизлик қурбони бўлдим. Сайловга қадар номзодимни рўйхатга қўйиб, мени яхши кутиб олишди. Хурсанд бўлдим, лекин сайлов куни — 2022 йилнинг 19 май куни номзодим олинганини, мен сайловда қатнаша олмаслигимни билдиришди. Тўғриси, бу менга жуда қаттиқ таъсир қилди», — дейди Ли Айгул.

«МФЙ раислигига сайлов куни эрта тонгдан ҳокимият вакилларидан уч нафар номзод ҳақида сўрадим ва ҳаммасининг исм-шарифини ўқиб, эълон қилаверайми дедим, ҳокимиятдагилар эълон қилаверинг, дейишди. Шундан сўнг биринчи номзод ўз дастури ҳақида маълумот бера бошлади. Бироз ўтиб эса ҳокимият вакиллари Ли Айгулнинг номзоди олиб ташланганини, энди унга навбат бермаслигим кераклигини айтишди. Сайлов комиссияси раиси сифатида бунинг сабабини билишим кераклигини сўрадим. Шунда қўлимга туман ҳокими имзолаган хатни беришди. Унда Ли Айгулнинг номзоди олинишига унинг иш тажрибаси кам бўлмаганлиги сабаб қилиб кўрсатилган экан. Тўғриси, тушунмай қолдим. Шундан сўнг залдаги одамлар ҳам тўполон кўтариб, залдан чиқиб кетишди», — дейди Рустам Зайнутдинов.

Сайлов жараёнида сайлов комиссияси раиси вазифасини бажарган Рустам аканинг айтишича, Ли Айгул номзоди сабабсиз олиб ташлангани боис залда бўлган 70-80 кишининг 50 нафари норозилигини билдириб, сайловда иштирок этишдан бош тортган ва зални тарк этган.

«Ли Айгулнинг номзоди ҳоким имзолаган ҳужжатга кўра олиб ташланганини эълон қилганимда залдаги одамлар раисни ҳоким сайлайдими ёки одамлар, дея шовқин кўтара бошлашди. Ва тахминан 70-80 кишидан 50 нафари зални тарк этди. Залда 15 нари борса 20 нафар одам қолди. Энг қизиғи ҳокимият вакиллари шунча одам билан сайлов ўтказиб, раис сайлашди», — дейди Рустам Зайнутдинов.

Сайлов жараёнида сайлов комиссияси раиси вазифасини бажарган Рустам аканинг тушунтиришича, Ли Айгулга сайловга қадар МФЙ раиси вазифасини бажариб турган, МФЙ раислигига номзод Гулнора Мадаминова қўнғироқ қилиб, номзоди олиб ташланганини айтган. Шундан сўнг Ли Айгул шахсан туман ҳокимига қўнғироқ қилиб, нега бунақа бўлаётганини сўраган. Туман ҳокими эса жараёндан хабари йўқлигини, Ли Айгулнинг номзоди олинмаганини, бунга аниқлик киритиш мақсадида ишчи гуруҳ юборишини айтган.

«Ишчи гуруҳ ўша куни ёнимга келди ва сизнинг номзодингиз олинмаган, бемалол сайловда қатнашишингиз мумкин дейишди. Аммо эртаси куни эса номзодим олинганини, бунга иш тажрибам кам бўлмагани сабаб қилиб кўрсатилгани ёзилган эди», — дейди Ли Айгул.

«Ҳоким имзолаган хатни қўлимга беришганида иккинчи номзод сайловчиларга ўз дастури ҳақида маълумот бераётганди. Энди Ли Айгул чиқиши керак эди. Аммо тўхтатинг, чиқарманг дейишди. Бу эса сайловчилар эътирозига сабаб бўлди», — дейди Растам Зайнутдинов.

«Ли Айгулнинг навбати келганда у ўз дастури ҳақида сайловчиларга маълумот бериши керак бўлган пайтда туман ҳокими имзолаган хатни ўқиб эшиттиришди. Унда Ли Айгулнинг иш тажрибаси кам бўлмаганлиги сабабли маъқулланмади деб ўқишди. Шунда биз ҳайрон қолдик. Залдагилар эса бақир-чақир қилиб, бу нима аҳвол дейишди. Ва норозилигини ошкор қилиб, залдан чиқиб кетишди», — дейди воқеа ҳақида гапириб берган Алиқул Қаратаев.

Алиқул Қаратаевнинг тахмин қилишича, сайлов тақдири аввалроқ ҳал қилиб қўйилган.

«Менимча сайловга қадар раис кимлигини аниқлаб қўйишган. Сайлов жараёни шунчаки ўйин тариқасида ўтказилди. Боиси Ли Айгул номзоди олинганидан кўпчилик норози бўлиб, деярли ҳамма залдан чиқиб кетса ҳам 15-20 киши билан сайлов ўтказишди. Содда қилиб айтганда, халқнинг устидан кулишди», — дейди Алиқул ака.

Сайлов жараёни пайтида жамоатчилик вакили сифатида воқеаларни съёмка қилган Тахмина Жолдибаеванинг айтишича, у сайлов адолатли ўтишини таъминлаш мақсадида жараённи телефонига тасвирга олишга уринган. Аммо ҳокимият вакиллари, айнан туман ҳокимининг Лазиз исмли ўринбосари унга қаршилик қилиб, судга бериш билан қўрқитган.

«Лазиз ака деган ҳоким ўринбосари келиб, менинг блогерлигим ҳақида лицензиям йўқлигини айтиб, тасвирга олиш ишларимни тўхтатишимни талаб қилди. Мен эса одамлар сайловдан норози бўлаётганини, адолатни таъминлаш мақсадида воқеаларни тасвирга олаётганимни айтдим. У эса тасвирга олишни тўхтатишимни, бу ишим учун мени судга беришини айтиб қўрқитди. Мен қўрққанимдан тасвирга олишни тўхтатдим», — дейди Тахмина Жолдибаева.

«Дарё»нинг бу ҳақдаги сўровига жавоб берган Бўстонлиқ тумани ҳокими ўринбосари Лазиз Тожибоев Ли Айгулнинг номзоди олиб ташлангани ҳақидаги хабар сайловдан беш кун аввал сайлов комиссияси раиси Рустам Зайнутдиновга етказилганини айтмоқда.

Лазиз Тожибоевга кўра, ҳоким имзолаган хатда англашилмовчиликка йўл қўйилган.

«Ҳоким имзолаган хулоса хатида номзоднинг бошқарув лавозимларида иш тажрибаси кам бўлмаганлиги сабабли номзоди маъқулланмади деб адашишган, аммо иш тажрибаси кам бўлганлиги сабабли рад этилган», — дейди ҳоким ўринбосари.

«Дарё» воқеалар ривожини кузатишда давом этади.