Аҳад Қаюмнинг ўхшамаган пиари, саҳнани эгаллаган вайнчилар. Ҳамдам Собировнинг илк яккахон концертидан репортаж (видео)

«Мактабимда» қўшиғи билан мухлислар қалбидан жой эгаллаган хонанда Ҳамдам Собиров 24—25 май кунлари «Халқлар дўстлиги» санъат саройида мактаб битирувчилари учун концерт дастури ўтказди. «Дарё» мухбирлари концертга ташриф буюриб, фото ва видеорепортаж тайёрлади.

Концерт олди ижодкорлар давра қуриб, суҳбатлашишяпти. Бу пайтда сарой томошабинлар билан тўлмоқда. Концерт бошланишига 15 дақиқа қолган.

Саҳна қоидаларига биноан нафақат аёллар балки эркакларга ҳам шундай оро берилади.

2022- йил хонанда учун ниҳоятда омадли келмоқда. Бунинг исботини YouTube тармоғидаги натижалардан ҳам билса бўлади. «Мактабимда» клипи YouTube’да 45 миллион марта, уч ой олдин жойланган «Тентакчам» эса 52 миллион маротаба томоша қилинган. Бу ҳавас қилишга арзийдиган натижа.

Энди концерт билан боғлиқ маълумотлар билан ўртоқлашсак. Хонанданинг илк яккахон концерт дастурида концерт санасига монанд 25 та қўшиқ ижро этилиши режалаштирилганди. Афсуски, дуетдошларидан бирининг иштирок этолмаслиги сабаб қўшиқлар сони биттага қисқарди.

Концертда «Мактабимда» ва «Тентакчам» клипларида портнёр сифатида суратга тушган вайнер Dili.me ва Райҳон Асадова бошловчилик қилди. Улар илгари концерт дастурида бошловчилик қилишмагани учун саҳнада ҳаяжонлангани яққол сезилди.

Хонанда саҳнада оддий чиқишни истамай юқорига илинган арғимчоқ орқали мухлисларига кўриниш берди. Ёдингизда бўлса, анча йиллар аввал Райҳон ҳам концертида шундай чиқиш қилганди.

Ҳамдам Собиров Жаноб Расул билан «Арзимайсан» номли дуетни ҳам куйлашни режалаштирганди. Афсуски, хонанда концертга ташриф буюролмади.

Хонанда концерт аввалида ҳаёти билан боғлиқ кичик роликни намойиш этди. Яъни у болалигида моддий қийинчиликлар сабаб ишлашга мажбур бўлгани, машҳурлик ҳаётига тушдек кириб келганини кўрсатиб берди.

Пиарчи Аҳад Қаюм саҳнага катта музлатгич қутисида чиқиб келди. Рости, бу унчалик ўхшамаган ва яхши саҳналаштирилмаган чиқиш бўлди.

Концертдан бир кун аввал Аҳад Қаюм Instagram орқали хонандани қўшиқчи шеър учун келишилган пулларни бермаганликда айблаб, видеомурожаат чиқарганди. «Концертингни бузаман», деган таҳдид шунчаки пиар экани дастур давомида аниқ бўлди. Чунки Аҳад Қаюмнинг ўзи концертда бош-қош бўлди.

Зиёда билан куйланган «Қора атиргул» дуети эса бутун зални жонлантирди. Мухлислар улар билан бирга қўшиқни ижро этди.

Хонанда марҳума онасига бағишлаб «Онам қани?» номли қўшиқни ижро қилди. Дардли қўшиқ мухлисларнинг кўзларини ёшлатди.

Концертда YouTube тармоғида «Сайфуллони излаб» ҳажвий сериали билан кузатувчиларга яхши таниш бўлган йигитлар ҳам иштирок этди.

Концертда Ҳамдам Собиров имижига монанд кийинган йигитлар кўп эди. Узун соч, кенг шим ва бетартиб мўйлов. Бу имиж хонанда ижодидаги ўзига хослик бўлса-да, меъёрдан ошгач бачканадек кўринади.

Ҳамдам Собиров ижодини бошлаганига роппа-роса 10 йил бўлди. Бу илк яккахон концерт дастури бўлгани учун ҳам камчиликлардан холи ўтмади. Хонанда саҳнада бир неча бор кучли ҳаяжонда эканини, ҳатто рэпертуарни ҳам унутиб қўяётганини таъкидлаб ўтди. Шундай бўлса-да, дастур мухлисларга манзур келди. Улар хонанда билан бирга қўшиқларни ижро этди.