Ahad Qayumning o‘xshamagan piari, sahnani egallagan vaynchilar. Hamdam Sobirovning ilk yakkaxon konsertidan reportaj (video)

“Maktabimda” qo‘shig‘i bilan muxlislar qalbidan joy egallagan xonanda Hamdam Sobirov 24—25-may kunlari “Xalqlar do‘stligi” san’at saroyida maktab bitiruvchilari uchun konsert dasturi o‘tkazdi. “Daryo” muxbirlari konsertga tashrif buyurib, foto va videoreportaj tayyorladi.

Konsert oldi ijodkorlar davra qurib, suhbatlashishyapti. Bu paytda saroy tomoshabinlar bilan to‘lmoqda. Konsert boshlanishiga 15 daqiqa qolgan.

Sahna qoidalariga binoan nafaqat ayollar balki erkaklarga ham shunday oro beriladi.

2022- yil xonanda uchun nihoyatda omadli kelmoqda. Buning isbotini YouTube tarmog‘idagi natijalardan ham bilsa bo‘ladi. “Maktabimda” klipi YouTube’da 45 million marta, uch oy oldin joylangan “Tentakcham” esa 52 million marotaba tomosha qilingan. Bu havas qilishga arziydigan natija.

Endi konsert bilan bog‘liq ma’lumotlar bilan o‘rtoqlashsak. Xonandaning ilk yakkaxon konsert dasturida konsert sanasiga monand 25 ta qo‘shiq ijro etilishi rejalashtirilgandi. Afsuski, duyetdoshlaridan birining ishtirok etolmasligi sabab qo‘shiqlar soni bittaga qisqardi.

Konsertda “Maktabimda” va “Tentakcham” kliplarida portnyor sifatida suratga tushgan vayner Dili.me va Rayhon Asadova boshlovchilik qildi. Ular ilgari konsert dasturida boshlovchilik qilishmagani uchun sahnada hayajonlangani yaqqol sezildi.

Xonanda sahnada oddiy chiqishni istamay yuqoriga ilingan arg‘imchoq orqali muxlislariga ko‘rinish berdi. Yodingizda bo‘lsa, ancha yillar avval Rayhon ham konsertida shunday chiqish qilgandi.

Hamdam Sobirov Janob Rasul bilan “Arzimaysan” nomli duyetni ham kuylashni rejalashtirgandi. Afsuski, xonanda konsertga tashrif buyurolmadi.

Xonanda konsert avvalida hayoti bilan bog‘liq kichik rolikni namoyish etdi. Ya’ni u bolaligida moddiy qiyinchiliklar sabab ishlashga majbur bo‘lgani, mashhurlik hayotiga tushdek kirib kelganini ko‘rsatib berdi.

Piarchi Ahad Qayum sahnaga katta muzlatgich qutisida chiqib keldi. Rosti, bu unchalik o‘xshamagan va yaxshi sahnalashtirilmagan chiqish bo‘ldi.

Konsertdan bir kun avval Ahad Qayum Instagram orqali xonandani qo‘shiqchi she’r uchun kelishilgan pullarni bermaganlikda ayblab, videomurojaat chiqargandi. “Konsertingni buzaman”, degan tahdid shunchaki piar ekani dastur davomida aniq bo‘ldi. Chunki Ahad Qayumning o‘zi konsertda bosh-qosh bo‘ldi.

Ziyoda bilan kuylangan “Qora atirgul” duyeti esa butun zalni jonlantirdi. Muxlislar ular bilan birga qo‘shiqni ijro etdi.

Xonanda marhuma onasiga bag‘ishlab “Onam qani?” nomli qo‘shiqni ijro qildi. Dardli qo‘shiq muxlislarning ko‘zlarini yoshlatdi.

Konsertda YouTube tarmog‘ida “Sayfulloni izlab” hajviy seriali bilan kuzatuvchilarga yaxshi tanish bo‘lgan yigitlar ham ishtirok etdi.

Konsertda Hamdam Sobirov imijiga monand kiyingan yigitlar ko‘p edi. Uzun soch, keng shim va betartib mo‘ylov. Bu imij xonanda ijodidagi o‘ziga xoslik bo‘lsa-da, me’yordan oshgach bachkanadek ko‘rinadi.

Hamdam Sobirov ijodini boshlaganiga roppa-rosa 10 yil bo‘ldi. Bu ilk yakkaxon konsert dasturi bo‘lgani uchun ham kamchiliklardan xoli o‘tmadi. Xonanda sahnada bir necha bor kuchli hayajonda ekanini, hatto repertuarni ham unutib qo‘yayotganini ta’kidlab o‘tdi. Shunday bo‘lsa-da, dastur muxlislarga manzur keldi. Ular xonanda bilan birga qo‘shiqlarni ijro etdi.