Ижтимоий тармоқларда Наманган вилояти Чортоқ туманидаги «Қумробод» маҳалласидаги кўприкни сел оқизиб кетгани тасвирланган видеолар тарқалди. Вилоят ФВБ ҳолатга муносабат билдириб, ҳозирда табиий офат оқибатларини бартараф этиш бўйича ишлар олиб борилаётганини маълум қилди.
Маълум қилинишича, бир неча кундан буён об-ҳавонинг кескин ўзгариши ва аксарият ҳудудларда ёғингарчиликлар кузатилгани туфайли Наманган вилоятидан ўтувчи айрим ҳудудлардаги сойларга сел келган.
«Чортоқ тумани ‘Қумробод’ маҳалласида айни вақтда туман Фавқулодда вазиятлар бўлими ва фавқулодда вазиятларда давлат қуйи тизимлари ходимлари томонидан юзага келган ҳолатни бартараф этиш чоралари кўрилмоқда», — дейилади муносабатда.
Аввалроқ Қирғизистонда кузатилган кучли ёғингарчилик оқибатида Чортоққа сел келгани, Наманганда кучли ёмғир кўприкни қисман емириб юборгани тўғрисида хабар берилганди.
Изоҳ (0)