Халқ депутатлари Андижон шаҳар кенгаши депутати сессия иши жонли эфирга узатилмаётганини танқид қилди. Ва сессия ишида раислик қилувчининг эътирозига сабаб бўлди.
«Сессияга раислик қилувчи сифатида сизни огоҳлантираман, телефонингизни ўчириб қўйинг. Йўқса сизни судга берамиз», — дейди сессия иши бошланган пайтда жонли эфир қилаётган депутатга мурожаат қилган масъул.
Шаҳар кенгаши депутати Жаҳонгир Жиянов эса сессияда ўтирган депутатлар халқ вакили эканини, шу боис сессия ишини халқдан яширмай, жонли эфир қилиш тарафдори эканини айтиб, телефонини ўчирмаслигини айтади.
«Президентимиз фармонида сессияни жонли эфир орқали халққа кўрсатиш талаби қўйилган. Нега энди сиз президент фармонига қарши чиқяпсиз? Президентимиз талаб қиляпти, аммо депутатларимиз бунга амал қилмаяпти», — дейди депутат.
Сессияга раислик қилувчи депутатнинг бу гапига жавобан сессия иши шаҳар ҳокимлиги ахборот хизмати томонидан ёритиб борилаётганини айтади. Депутат эса, шаҳар ҳокимлиги ахборот хизмати сессия ишидан жонли эфир қилмаётганини билдиради.
Андижон шаҳар ҳокимлиги ахборот хизмати раҳбарининг «Дарё» мухбирига билдиришича, мазкур сессия 2022 йилнинг 28 май куни бўлиб ўтган бўлиб, айнан шу сессиядан жонли эфир қилинмаган.
«Бундан аввал барча сессия ишларидан жонли эфир қилиб борардик. Айнан шу сессияда видеога олдик, аммо жонли эфир қилолмадик», — дейди ҳокимлик ахборот хизмати масъули.
Маълум бўлишича, сессия ҳақида шаҳар ҳокимлигининг расмий каналларида бирор-бир ахборот берилмаган.
Ижтимоий тармоқлар орқали тарқалган видеодан англашилишича, Андижондаги сессия аввалида мазкур жараёнга вилоят кенгаши депутати ҳам аралашиб, сессия ишида эксперт сифатида иштирок этаётганини айтиб, сессияни жонли эфир орқали жамоатчиликка узатишда менталитетдан келиб чиқиш лозимлигини билдиради.«Дарё» мухбири мазкур ҳолат юзасидан депутат Жаҳонгир Жиянов билан суҳбатлашиб, масалага ойдинлик киритишга уринмоқда. Тез орада воқеа ҳақида депутатнинг ўзи батафсил маълумот беради.
Изоҳ (0)