Ўзбекистон қиличбозлик федерациясининг навбатдан ташқари ҳисобот-сайлов конференцияси 27 май, жума куни бўлиб ўтди.
Унда федерацияга янги раҳбар сайлаш кун тартибидаги асосий масала сифатида кўриб чиқилди. Йиғилишда Ўзбекистон қиличбозлик федерацияси раиси лавозимига Мақсуд Абдусаматов номзоди бир овоздан сайланди.
Абдусаматов айни вақтда «Капиталбанк» АТБ Кузатув кенгаши раиси сифатида ҳам фаолият олиб боряпти.
2018 йилнинг ноябрь ойидан буён Ўзбекистон қиличбозлик федерацияси раиси лавозимида ишлаб келаётган Рустам Шоабдураҳмонов ўз аризасига кўра ишдан кетган. Шунингдек, шу кунга қадар Ўзбекистон қиличбозлик федерациясига бош котиб вазифасида фаолият кўрсатиб келган Гулнора Саидова мазкур лавозимга қайта сайланган.
2019 йилнинг май ойида Миллий Олимпия қўмитасига раис этиб сайланган Рустам Шоабдураҳмонов 2022 йилнинг февралида мазкур лавозимдан кетганди.
Мақсуд Абдусаматов 1994 йилдан банк соҳасидаги фаолияти бошлаган. Абдусаматов қуйидаги лавозимларда фаолият олиб борган: «Ўзприватбанк» ғазначилик департаменти директори (1998—1999), «Бизнес Банк» ХАТБ бошқарув раиси (2000—2003), «Капиталбанк» АТБ бошқарув раиси (2004—2011).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)