Хоразм ва Қашқадарё вилоятларида олиб борилган тезкор тадбирлар давомида ноқонуний валюта савдоси билан шуғулланиб келган шахслар фаолиятига чек қўйилди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Янгиариқ тумани бўлими томонидан валюта қимматликларининг ноқонуний муомалага киритилишининг олдини олиш юзасидан тезкор тадбир ўтказилган. Тадбир давомида фуқаро Х.М. бошқа бир фуқаро М.дан 3,7 минг долларни 35,6 миллион сўмга сотиб олган вақтида ушланган. Ундан 35,6 миллион сўм ва ёнида ноқонуний айирбошлаш учун сақлаб келган 300 доллар, 4 минг Россия рубли ва 65,5 минг қозоқ тенгеси ашёвий далил тариқасида олинган.
Шунингдек, департаментнинг Чироқчи туман бўлими томонидан ўтказилган тезкор тадбирда А.Х. исмли шахс 4,5 минг долларни 50,4 миллион сўмга сотган вақтида ушланган. «Юқоридаги фуқароларнинг ҳаракатлари бўйича олиб борилган тезкор кузатувларда улар доимий равишда валюта қимматликларини қонунга зид равишда айирбошлаш фаолияти билан шуғулланиб келганликлари маълум бўлган», — дейилади хабарда.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Қашқадарёда валютафуруш 2,5 минг долларни сотаётганида қўлга тушгани, Хоразм вилоятида 6,8 минг долларни ноқонуний сотишга уринган шахслар ушлангани, Тошкент вилоятида 11 минг долларни ноқонуний сотишга уринган шахслар қўлга олингани тўғрисида хабар берилганди.
Изоҳ (0)