«Аҳолининг ижтимоий ҳимояга муҳтож қатламларини манзилли қўллаб-қувватлашга оид қўшимча чора-тадбирлар тўғрисида»ги президент қарори имзоланди. Ҳужжат матни ЎзАда эълон қилинди.
Қайд этилишича, давлат бюджети маблағлари ҳисобидан ижтимоий ҳимояга муҳтож аҳолининг бир қатор қатламларига бир марталик моддий ёрдам кўрсатилади. Жумладан, ёшга доир, ногиронлик пенсияси ва нафақасини олувчиларга, болаликдан ногиронлик нафақасини ҳамда боқувчисини йўқотганлик пенсиясини ва нафақасини олувчи ҳар бир оила аъзосига ҳамда ўзгалар парваришига муҳтож ногиронлиги бўлган 18 ёшгача болаларнинг парваришлаш нафақасини олувчиларга:
- Қорақалпоғистон Республикаси ва вилоятларда – 300 минг сўмдан;
- Тошкент шаҳрида – 400 минг сўмдан.
Шунингдек, «Ижтимоий ҳимоя ягона реестри» ахборот тизими орқали кам таъминланган сифатида моддий ёрдам олувчи оилаларга ҳамда кам таъминланган сифатида болалар нафақасини олувчи оилаларнинг ҳар бир 18 ёшга тўлмаган боласига 200 минг сўмдан берилади.
Бир нечта тоифа бўйича бир марталик моддий ёрдам олиш ҳуқуқига эга бўлган шахсларга бир марталик моддий ёрдам ҳар бир тоифа бўйича тўлаб берилади.
Қарорда белгиланган бир марталик моддий ёрдам тўловларини икки ҳафта муддатда тўлиқ тўлаб берилади. Уйида вақтинча бўлмагани ёки бошқа сабабларга кўра бир марталик моддий ёрдам пулларини ўз вақтида ололмаган фуқаролар тўланмаган моддий ёрдам пулларини 2022 йил 1 сентябрга қадар олиш ҳуқуқига эга.
Бундан ташқари, «темир дафтар»га киритилган ҳамда мазкур қарорга асосан бир марталик моддий ёрдам пулларини олмаган эҳтиёжманд оилалар рўйхати шакллантирилади. «Саховат ва кўмак» жамғармаси маблағлари ҳисобидан ушбу оилаларнинг ҳар бир аъзосига 20 килограммдан бепул ун тарқатилади.
Қарорнинг ижросини назорат қилиш бош вазир Абдулла Арипов зиммасига юклатилган.
Аввалроқ Ўзбекистонда 1 июндан тиббиёт ходимларининг ойлик маошлари оширилиши, пенсияни пластик картада олувчиларга 1 фоиз қўшимча пул берилиши, хорижда ишлаётган фуқаролар ва уларнинг оила аъзоларига моддий ёрдам кўрсатилиши хабар қилинган.
Изоҳ (0)