26 май куни Бухоро шаҳрида Ўзбекистон камбағалликни қисқартириш халқаро форуми бошланди. Унда бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоров нутқ сўзлади, деб хабар бермоқда «Дарё» мухбири.
Қўчқоровнинг сўзларига кўра, мазкур форум Ўзбекистонда ислоҳотларнинг янги босқичида камбағалликни қисқартириш мавзусини муҳокама қилиш ва тажриба алмашиш мақсадида халқаро ташкилотлар, ҳамкор давлатлар ҳамда дунёнинг таниқли олим ва экспертларини ягона мулоқот платформасига жамлангани билан муҳим аҳамият касб этади.
«Президент Шавкат Мирзиёев етакчилигида ва кучли сиёсий ирода ҳисобига 2020 йилда мамлакат тарихида илк бор камбағалликни қисқартириш масаласи иқтисодий ислоҳотларнинг асосий мақсадларидан бири этиб белгиланди. Қисқа муддатларда камбағалликни қисқартириш борасида институционал тизим яратилиб, фундаментал ёндашувлар асосида таъсирчан инструментлар амалиётга жорий этилди.
Бунга, амалиётга жорий этилган ягона ижтимоий реестрни, минимал истеъмол харажатлари меъёрини, кам таъминланган оилаларда ҳар бир болани қамраб олувчи манзилли ижтимоий кўмак кўрсатишни ҳамда аҳолини касб-ҳунарга ўқитиш бўйича янги тизимни мисол қилиб келтириш мумкин», — дейди Жамшид Қўчқоров.
«Янги Ўзбекистон Тараққиёт стратегияси»да кўзда тутилган мақсад, яъни камбағалликни 2026 йилга қадар 2 бараварга қисқартиришга эришишнинг асосий шарти бўлиб, барқарор юқори ва инклюзив иқтисодий ўсишни таъминлаш ҳисобланади. Иқтисодий тараққиёт ва камбағалликни қисқартириш вазирига кўра, бунинг учун қуйидагиларни амалга ошириш лозим:
- хусусий секторни, жумладан, кичик ва ўрта бизнеснинг ривожланиши учун зарур шароитларни таъминлаш ва шу орқали барқарор иш жойларини яратиш;
- инсон капиталини ривожлантириш ва меҳнат унумдорлигини ошириш;
- энергия ресурслари нархларини либераллаштириш ва самарасиз субсидиялар ҳажмини камайтириш ҳисобига ижтимоий лойиҳаларга йўналтириладиган давлат ресурслари миқдорини кўпайтириш;
- мазкур жараёнда, асосий эътиборни, кам таъминланган оилаларни ҳимоя қилишга қаратиш;
- давлат корхоналарини трансформация қилиш ҳамда хусусийлаштиришни жадаллаштириш ва мазкур жараёнда рақобат ва бизнес муҳитини яхшилаб бориш;
- қишлоқ хўжалигида унумдорликни ошириш, бунда энг аввало ер ислоҳотларини чуқурлаштириш;
- яшил ва рақамли иқтисодиётга ўтиш жараёнларини тезлаштиришга қаратилган ислоҳотлар давом эттириш.
Эслатиб ўтамиз, президент Шавкат Мирзиёев 2020 йил бошида мамлакатда камбағаллик даражаси 12-15 фоиз атрофида эканини айтганди. «Гап 4-5 миллион аҳоли вакиллари ҳақида кетяпти. Бу — жуда катта рақам», — деган эди давлат раҳбари Олий Мажлисга мурожаатида.
Изоҳ (0)