26-may kuni Buxoro shahrida O‘zbekiston kambag‘allikni qisqartirish xalqaro forumi boshlandi. Unda bosh vazir o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorov nutq so‘zladi, deb xabar bermoqda “Daryo” muxbiri.
Qo‘chqorovning so‘zlariga ko‘ra, mazkur forum O‘zbekistonda islohotlarning yangi bosqichida kambag‘allikni qisqartirish mavzusini muhokama qilish va tajriba almashish maqsadida xalqaro tashkilotlar, hamkor davlatlar hamda dunyoning taniqli olim va ekspertlarini yagona muloqot platformasiga jamlangani bilan muhim ahamiyat kasb etadi.
“Prezident Shavkat Mirziyoyev yetakchiligida va kuchli siyosiy iroda hisobiga 2020-yilda mamlakat tarixida ilk bor kambag‘allikni qisqartirish masalasi iqtisodiy islohotlarning asosiy maqsadlaridan biri etib belgilandi. Qisqa muddatlarda kambag‘allikni qisqartirish borasida institutsional tizim yaratilib, fundamental yondashuvlar asosida ta’sirchan instrumentlar amaliyotga joriy etildi.
Bunga, amaliyotga joriy etilgan yagona ijtimoiy reyestrni, minimal iste’mol xarajatlari me’yorini, kam ta’minlangan oilalarda har bir bolani qamrab oluvchi manzilli ijtimoiy ko‘mak ko‘rsatishni hamda aholini kasb-hunarga o‘qitish bo‘yicha yangi tizimni misol qilib keltirish mumkin”, — deydi Jamshid Qo‘chqorov.
“Yangi O‘zbekiston Taraqqiyot strategiyasi”da ko‘zda tutilgan maqsad, ya’ni kambag‘allikni 2026-yilga qadar 2 baravarga qisqartirishga erishishning asosiy sharti bo‘lib, barqaror yuqori va inklyuziv iqtisodiy o‘sishni ta’minlash hisoblanadi. Iqtisodiy taraqqiyot va kambag‘allikni qisqartirish vaziriga ko‘ra, buning uchun quyidagilarni amalga oshirish lozim:
- xususiy sektorni, jumladan, kichik va o‘rta biznesning rivojlanishi uchun zarur sharoitlarni ta’minlash va shu orqali barqaror ish joylarini yaratish;
- inson kapitalini rivojlantirish va mehnat unumdorligini oshirish;
- energiya resurslari narxlarini liberallashtirish va samarasiz subsidiyalar hajmini kamaytirish hisobiga ijtimoiy loyihalarga yo‘naltiriladigan davlat resurslari miqdorini ko‘paytirish;
- mazkur jarayonda, asosiy e’tiborni, kam ta’minlangan oilalarni himoya qilishga qaratish;
- davlat korxonalarini transformatsiya qilish hamda xususiylashtirishni jadallashtirish va mazkur jarayonda raqobat va biznes muhitini yaxshilab borish;
- qishloq xo‘jaligida unumdorlikni oshirish, bunda eng avvalo yer islohotlarini chuqurlashtirish;
- yashil va raqamli iqtisodiyotga o‘tish jarayonlarini tezlashtirishga qaratilgan islohotlar davom ettirish.
Eslatib o‘tamiz, prezident Shavkat Mirziyoyev 2020-yil boshida mamlakatda kambag‘allik darajasi 12-15 foiz atrofida ekanini aytgandi. “Gap 4-5 million aholi vakillari haqida ketyapti. Bu — juda katta raqam”, — degan edi davlat rahbari Oliy Majlisga murojaatida.
Izoh (0)